Во Италија беше предизвикана здравствена загриженост поради сомнеж за ебола кај двајца повратници од Африка, но тестовите покажаа негативни резултати за вирусот. Се потврди бактериска инфекција со бактеријата Шигела, а Министерството за здравство ги уверува граѓаните дека ризикот од ебола останува низок.
Италијанските хуманитарни работници, кои беа хоспитализирани во Ломбардија поради симптоми слични на ебола, се негативни на вирусот. Тестовите спроведени во болницата Сако во Милано беа негативни и за маларија и за најчестите респираторни вируси.
Се сомнева на бактериска инфекција, бидејќи присуството на бактеријата Шигела е потврдено во двата случаи. Пациентите се вратиле од Уганда, а веста предизвика загриженост поради епидемијата на ебола во соседната Демократска Република Конго, пишува „Раи њуз“.
Регионалниот советник за социјална помош, Гвидо Бертоласо, објави дека резултатите од тестовите се негативни. Тој објасни дека станува збор за двајца хуманитарци кои, заедно со уште пет колеги, поминале околу три месеци во Уганда.
„Клиничката состојба на двете лица сè уште ја следат нашите специјалисти за заразни болести. Со оглед на првичните дијагностички наоди, една од хипотезите што ги разгледуваме е бактериска инфекција на дигестивниот систем. Имено, присуството на бактеријата Шигела е утврдено кај двете лица“, рече Бертоласо. Тој додаде дека во тек се дополнителни микробиолошки и културни тестови.
Советникот, исто така, ја критикуваше реакцијата на медиумите.
„Во моментов нема елементи за тревога. Доколку беа следени точните протоколи, медиумската паника што доведе до значително трошење ресурси и оперативни активности можеше да се избегне“, заклучи тој.
Италијанското Министерство за здравство ги потврди негативните наоди и рече дека ризикот од ебола во Италија „останува многу низок“.
фото/Depositphotos
