Во услови кога Центар секојдневно се соочува со огромен број возила, ограничен паркинг простор и зголемен сообраќаен метеж, одржувањето на редот во паркирањето станува едно од клучните прашања за нормално функционирање на градското јадро. Со илјадници возила кои секојдневно поминуваат низ неговите улици, прашањето „каде ќе се паркирам?“ често е првата мисла на секој граѓанин, посочуваат од ЈП Паркинзи на Општина Центар.

Три клучни улоги на ПОЦ

„Токму затоа, ЈП Паркинзи на Општина Центар има значајна улога во организирањето, контролата и одржувањето на јавните паркиралишта на територијата на Општина Центар. Иако првата асоцијација на граѓаните за ПОЦ често е наплатата за паркинг место, улогата на претпријатието е значително поширока.

Одржувањето на ред во паркирањето не значи само наплата, туку цел систем што опфаќа обележување и одржување на паркиралиштата, контрола на правилното користење на просторот, следење на почитувањето на правилата, како и воведување модели што треба да обезбедат поправедно и порационално користење на јавниот простор. Притоа, системот треба да воспостави рамнотежа меѓу потребите на посетителите и интересот на жителите за поуреден и пофункционален јавен простор во местото каде што живеат“.

Контрола и интервенции

Како што појаснуваат од таму, надзорот над правилното користење на јавните паркиралишта го вршат овластени лица вработени во ЈП ПОЦ. Тие, според соопштението, се задолжени за контрола на плаќањето на паркингот, времето на задржување на возилата, како и условите на користење на повластените паркинг карти.

„Паркинг контролорите користат современа техничка опрема преку која се евидентираат регистарските таблички, времето на паркирање и статусот на возилото, со што се овозможува поефикасна контрола и поголема прегледност во системот.

Кога правилата не се почитуваат, неопходна е и соодветна интервенција. Пајак-службата на ПОЦ постапува согласно законските надлежности и јасно утврдени процедури, а во најголем дел од случаите и во координација со овластено службено лице од сообраќајната полиција, кое го утврдува прекршокот и дава насока за постапување. Работата на службата се одвива согласно оперативниот режим и присуството на полицијата.

Кога возилата се паркираат на тротоари, пред влезови, на зелени површини или на други места што не се наменети за паркирање, директно се нарушуваат безбедноста, проодноста и нормалното движење на граѓаните. Затоа се неопходни контрола и доследно почитување на правилата. Целта на овие интервенции не е санкција сама по себе, туку обезбедување на ред и безбедност во сообраќајот“, посочуваат од ПОЦ.

Новиот модел и дигитализацијата

Од претпријатието велат дека со новиот модел на паркирање се очекува подобра организација на јавниот простор, појасно уредување на правото на користење на повластените услови и значително намалување на злоупотребите.

Една од најважните промени е воведувањето на повластени паркинг карти по станбена единица, наместо по жител, со што треба да се обезбеди поправедна распределба на паркинг просторот и поголема достапност за жителите на Центар, особено во местото на живеење.

Воедно, ПОЦ најавува и засилена дигитализација на услугите, електронска контрола и можност голем дел од услугите да се користат преку официјалната веб-страница, мобилна апликација или електронски системи за плаќање.

Од ЈП „Паркинзи на Општина Центар“ порачуваат дека крајната цел е создавање поуреден, побезбеден и пофункционален јавен простор.

„Паркирањето не е само комунална услуга, туку прашање на урбана култура, безбедност и квалитет на живот. Со јасни правила, контрола и модернизација на системот сакаме да создадеме повеќе ред, помал метеж и подобри услови за жителите на Центар онаму каде што е најпотребно“, велат од претпријатието.