Кирило Буданов, новиот шеф на кабинетот на украинскиот претседател Володимир Зеленски и поранешен шеф на воено-разузнавачката служба ХУР, открил дека Русија сè уште се обидува да го ликвидира, иако тој води клучни преговори со Москва за евентуален крај на војната во Украина.
Буданов во интервју за британскиот „Тајмс“ рекол дека смета дека е „сосема нормално“ што е на врвот на списокот за отстрел на Русија, со оглед на неговата долгогодишна улога во украинските специјални операции и разузнавачката работа против Кремљ.
Во рамки на својата нова улога, тој стана главен преговарач на Украина со Русија, водејќи дипломатски напори за завршување на војната, додека истовремено ја развива долгорочната одбранбена стратегија на Киев. Претседателот Зеленски го назначи Буданов за шеф на својот кабинет во јануари. Кариерно разузнавачки офицер заслужен за планирање и учество во некои од најспектакуларните специјални операции на украинските вооружени сили, тој бил одликуван со Орден за херој на Украина, највисокото воено одликување во земјата. Тој, исто така, тесно соработува со ЦИА.
Поради сето ова, „сосема е нормално“ Кремљ и понатаму да се обидува да го елиминира, рекол Буданов во своето прво интервју за британските медиуми откако ја презел функцијата. Во претседателската канцеларија има огромно обезбедување, но сепак се појавил на состанокот со новинарот на „Тајмс“ со пиштол во футрола. И покрај постојаната закана по неговиот живот, Буданов верува дека мировниот процес ќе ја заврши војната. „Не морам никому да му верувам, морам да постигнам резултат“, изјавил тој. „Сите начини, форми и методи на работа се добри ако го донесат тој резултат. Не се вклучувам во работи во кои не верувам… Верувам во процесот на преговори… во неговото завршување и исход“, истакнал Буданов.
Тој додал дека неговото искуство како врвен шпион му помага во преговорите за мировен договор, бидејќи сè уште има пристап до информатори и влијателни личности во Русија. Ова му дава клучни информации за силните страни, слабостите и „црвените линии“ на оние кои седат од другата страна на масата. „Со години се справуваме со нив, па верувајте ми на збор, знам како да разговарам со нив“, нагласил тој.
Како шеф на ХУР, Буданов изградил систем за преговарање за размена на затвореници, честопати потпирајќи се на тајни канали во Русија за да ги врати заробените украински војници и цивили дома. Овие канали сега се покажуваат корисни во мировните преговори. Сепак, планираната размена на затвореници „илјада за илјада“ што требаше да биде дел од примирјето на Денот на победата е намалена на само 205 воени затвореници. Буданов, исто така, признал дека сè уште нема точен датум за нови разговори.
Во меѓувреме, Русија е подготвена да ги исполни своите неодамнешни закани за масовен напад врз центарот на Киев. Ова се случи откако Кремљ ги предупреди западните земји да ги евакуираат своите амбасади и навести дека може да ја употреби својата ракета „Орешник“, која може да носи нуклеарни боеви глави. Буданов тврди дека стравувањата од нуклеарен напад што циркулираат во главниот град се неосновани, но дека рускиот арсенал сè уште претставува сериозна закана. „Русија дефинитивно има способност да изврши нуклеарен напад во кое било време и на кое било растојание. Нејзините нуклеарни капацитети го дозволуваат тоа. Но, тоа е првенствено прашање на политичка волја. Не сум видел никакви индикации за подготовки за нуклеарен напад. Да имаше, ќе знаев за тоа“, нагласил Буданов.
Тој стана легендарна фигура меѓу украинските војници и нивните западни сојузници, а оние кои служеле под негова команда често го споменуваат неговото име со стравопочит. Како обучен нуркач на специјалните сили, тој водел бројни операции зад непријателските линии, вклучувајќи напади во окупираниот Крим и бил ранет неколку пати во борба. По руската анексија на Крим и инвазијата на Донбас во 2014 година, ХУР влегол во немилосрдна војна на меѓусебна ликвидација со Кремљ. Операциите што Буданов ги надгледувал од почетокот на општата инвазија вклучувале таргетирање на високи колаборационисти во окупирана Украина, руски пропагандисти и генерали. Поради ова, тој се нашол на самиот врв на руската листа за отстрел. Повеќето обиди за атентат биле оневозможени во рана фаза и се чуваат во тајност, додека оние што биле поблиску до реализација понекогаш се објавуваат јавно.
Така, во 2024 година, Безбедносната служба на Украина (СБУ) објави дека спречила план за напад врз неговиот конвој со балистички ракети. Вклучени биле двајца полковници од Украинската администрација за државна заштита кои тајно работеле за Москва. СБУ ги уапси полковниците, како и третиот напаѓач кој требал да ги доврши преживеаните со камиказе-дрон (дрон ФПВ). Една година претходно, во 2023 година, сопругата на генералот, Маријана Буданова, била отруена со тешки метали, заедно со неколку разузнавачки офицери, во операција за која Киев верува дека била насочена кон најблискиот круг на Буданов. Исто така, во 2019 година, бомба што била поставена под автомобилот на Буданов експлодирала предвреме, одземајќи му ја раката на рускиот агент кој ја поставувал. Буданов наводно го бркал вториот напаѓач со пиштол во рака пред тој да успее да избега со автомобил.
Генералот бил назначен да раководи со претседателската канцеларија по истрагата за корупција што го собори неговиот претходник, Андриј Јермак. Оваа истрага, исто така, доведе до разрешување на Рустем Умеров, кој исто така бил вмешан, а на функцијата министер за одбрана го замени Михаило Федоров. И Буданов (40) и Федоров (35) се сметаат за прогресивни, креативни личности зад технолошките откритија во водењето асиметрична војна против Москва.
Од друга страна европските фондови и прекуграничните партнерства со компании ѝ дадоа силен „ветер во грб“ на украинската воено-технолошка индустрија. Програмата за беспилотни летала со долг дострел на Украина предизвикува пожари во руската нафтена и гасна инфраструктура низ целата земја со темпо и обем со кој војниците на претседателот Путин не се во можност да го следат. Украина се трансформира од земја што прима само западна воена помош во извозник на технологија и знаење за беспилотни летала, што Киев е подготвен да го сподели со своите партнери, истакнал Буданов. „Се развиваме многу побрзо бидејќи сме во војна. Можеме да го споделиме ова знаење во кој било воен сегмент, како и во областа на заштитата на инфраструктурата и системските промени во функционирањето на државата во воени услови“, истакнал ој.
Според него, најитниот проблем што сојузниците на Киев мора да го решат е организацијата на ефикасна воздушна одбрана, како што јасно покажа конфликтот на САД со Иран. САД и нивните сојузници од Заливот трошат скапи ракетни резерви за соборување евтини беспилотни летала. Заменувањето на овие ракети може да трае со години, додека беспилотните летала се склопуваат за неколку дена. „Во моментов, според мое субјективно мислење, најпотребната помош е како да се изгради повеќеслоен систем способен за брз одговор. Украина со задоволство ќе им подаде рака. Ако не им треба, никој нема да им се наметне“, рекол тој. Буданов додал дека е неизбежно војната наскоро да се води со „паметни“ автономни беспилотни летала, за кои Украина веќе има развиено прототипови.
Технолошката револуција што се одвива во Украина му овозможи на Киев да им нанесе големи загуби на своите руски напаѓачи. НАТО проценува дека помеѓу 20.000 и 25.000 руски војници гинат во борба секој месец и тоа за минимални тактички придобивки на терен. Во некои области, руските сили дури биле принудени да се повлечат откако „СпејсИкс“ се согласи да воведе задолжителна регистрација на уреди, исклучувајќи десетици илјади терминали на „Старлинк“ што руската војска нелегално ги користела за сателитски комуникации.
Буданов сè уште се соочува со многу трнливи предизвици. Неговиот претходник, Јермак, беше обвинет во понеделник за перење пари како дел од истрагата за корупција што ја разниша довербата во владата на Зеленски. Јермак поднесе оставка во јануари откако антикорупциските истражители извршиле рација во неговиот дом. Судењето против него, кое започна во вторник, би можело индиректно да го вмеша самиот Зеленски, иако претседателот не е под истрага. Буданов се дистанцира од Јермак, кој беше обвинет за стекнување неограничена моќ, велејќи дека ќе ја води функцијата на сосема поинаков начин и ќе им верува на своите подредени. „Нема микроменаџмент. Ќе им ја делегираме целосно власта на професионалци и ќе ја преземеме целосната одговорност за резултатот“, нагласил Буданов.
Меѓутоа, Украинците кои се надеваат дека тој би можел да го промени претходниот ригорозен пристап кон мобилизацијата ќе бидат разочарани. „Регрутирањето волонтери не може да ги покрие бројките што ѝ се потребни на армијата. Ова е невозможно поради економски проблеми, но и поради фактот дека по толку години војна повеќе нема мотив што би ги охрабрил толку многу луѓе доброволно да одат на бојното поле“, рекол Буданов и ветил дека ќе се бори против „инцидентите“ на воените офицери кои биле снимени како тепаат регрути на секој можен начин, но нагласил дека мобилизацијата мора да продолжи. „Моментално водиме најстрашна, сеопфатна, тотална војна. Војна во која учествуваат групи од милиони. Нема друг начин. Инаку, државата едноставно ќе се распадне“, заклучил Буданов.
