Врховниот командант на НАТО, Алексус Гринкевич, истакнува дека повлекувањето на 5.000 американски војници од Европа нема да ја доведе во ризик одбраната на континентот, бидејќи европските сојузници и Канада преземаат поголема одговорност во алијансата.
Врховниот командант на НАТО, Алексус Гринкевич, изјави дека одлуката на САД за повлекување на една оклопна бригада, односно околу 5.000 војници од Европа, нема да им наштети на одбранбените планови на Алијансата на континентот.
Гринкевич, кој се обрати во Брисел по состанокот со воените команданти на земјите членки на НАТО, нагласи дека европските сојузници и Канада преземаат поголема одговорност за конвенционалната одбрана во Европа, додека американските капацитети континуирано се прилагодуваат.
Според зборовите на командантот, зајакнувањето на европскиот столб во рамките на сојузот му овозможува на САД да го намали своето присуство на тлото на Европа.
Намалувањето на војниците значи дека САД во иднина ќе се ограничи главно на обезбедување на оние критични капацитети и способности кои сојузниците сè уште не можат сами да ги остварат.
Претходно, американскиот претседател Доналд Трамп го најави повлекувањето на околу 5.000 војници кои се стационирани во Германија.
