Редовната консумација може да го поттикне метаболизмот и да помогне во зачувување на мускулната маса. Сепак, секојдневното потпирање исклучиво на овие две состојки, без доволно влакна, зеленчук и здрави масти, може да доведе до нутритивни недостатоци, пишува „Health.com“.

Како пилешкото месо и оризот го поттикнуваат метаболизмот?

Пилешкото месо е целосен извор на протеини, што значи дека ги содржи сите девет есенцијални аминокиселини кои телото не може само да ги произведе. Истражувањата покажуваат дека исхраната богата со протеини може благо да го забрза метаболизмот, и краткорочно и долгорочно. Протеините воедно заситуваат повеќе од мастите или јаглехидратите.

Телото троши енергија за дигестија и преработка на протеините, што привремено го забрзува метаболизмот. Долгорочно, доволниот внес на протеини заедно со тренинг за сила помага во одржување на мускулната маса, што е клучно за метаболизмот бидејќи мускулите во мирување трошат повеќе калории од масното ткиво. Пилешкото месо исто така е извор на витамини од Б-групата, кои се важни за метаболичките процеси и за претворање на храната во енергија.

Комбинацијата со ориз му додава на оброкот јаглехидрати, главниот извор на енергија за телото. Јаглехидратите обезбедуваат гориво за мозокот, мускулите, вежбањето и другите дневни активности. Доволното количество енергија помага и во одржување на физичката активност во текот на денот.

Други придобивки од пилешкото месо и оризот

Освен влијанието врз метаболизмот, пилешкото месо и оризот нудат и други придобивки. Комбинирањето на протеини и јаглехидрати го забавува варењето и така придонесува за постабилно ниво на шеќер во крвта. Пилешкото месо содржи хранливи материи како витамини од Б-групата, селен и фосфор, додека оризот обезбедува енергија од јаглехидрати.

Ако изберете интегрален ориз, ќе внесете и повеќе влакна, минерали и антиоксиданти. Не треба да се занемари ниту практичноста: пилешкото месо и оризот се ценовно достапни, лесно се подготвуваат во поголеми количини и едноставно се комбинираат со различен зеленчук, сосови или зачини.

Недостатоци на секојдневната консумација

Пилешкото месо и оризот секако можат да бидат дел од урамнотежена исхрана. Меѓутоа, ако секој ден јадете ист оброк, тешко ќе ги внесете сите разновидни хранливи материи што му се потребни на телото за целокупно здравје и оптимално функционирање на метаболизмот.

Иако оваа комбинација обезбедува протеини, јаглехидрати и некои важни нутриенти, сиромашна е со витамин Ц, омега-3 масни киселини и влакна, освен ако во чинијата не додадете и други намирници.

Витаминот Ц, кој се наоѓа во цитрусното овошје, пиперките, јагодите и брокулата е клучен за имунитетот. Омега-3 масните киселини, присутни во масната риба, оревите, како и во чиа и лененото семе, се важни за здравјето на срцето и мозокот. Влакната, пак, се неопходни за добра дигестија, здравје на цревата и срцето, како и за регулирање на шеќерот во крвта.

Освен тоа, секојдневното јадење иста храна за многумина може да стане монотоно, што долгорочно го отежнува придржувањето до поставените прехранбени цели.

Како да го збогатите оброкот од пилешко месо и ориз?

Пилешкото месо и оризот можат да бидат хранлив и вкусен оброк, особено ако им додадете влакна, здрави масти и нови вкусови. Ако ги консумирате два до три пати неделно, ќе ја задржите практичноста, а истовремено ќе оставите простор за разновидност во исхраната.

Испробајте неколку едноставни совети. Подгответе поголема количина пилешко месо и ориз на почетокот на неделата, за подоцна побрзо да составите оброк. Користете различни зачини, свежи билки, маринади или сосови за да немате чувство дека секогаш јадете исто јадење.

Во оброкот додадете разнобоен зеленчук како брокула, пиперка, спанаќ, морков или боранија, за да внесете повеќе влакна и антиоксиданти. Почесто избирајте интегрален ориз, а иако белиот ориз е корисен за брза енергија, интегралниот содржи повеќе влакна, витамини и минерали. Менувајте ги и изворите на протеини, па во други денови избирајте риба, мисиркино месо, јајца, тофу, грав или леќа, за да обезбедите поширок спектар на нутриенти.