Претседателот на иранскиот парламент, Мохамед-Багер Галибаф, ги отфрли извештаите за можен договор меѓу Иран и САД, обвинувајќи ги американските медиуми за ширење на она што тој го опиша како повторени кампањи за дезинформации.
Во објава на социјалните мрежи, тој се потсмеваше на неодамнешните извештаи на американскиот новински медиум Аксиос, нарекувајќи ги „Операција Факсиос“.
„Операцијата „Верувај ми, брате“ не успеа. Сега се враќаме на рутината со операцијата Факсиос“, рече Галибаф, според иранската државна телевизија Прес ТВ.
Operation Trust Me Bro failed. Now back to routine with Operation Fauxios.
— محمدباقر قالیباف | MB Ghalibaf (@mb_ghalibaf) May 6, 2026
Иранскиот лидер прво ја споменува „Операцијата „Верувај ми, брате“ (“Trust me, bro”), интернет мем кој се потсмева на тврдења без докази или веродостојни извори. Тој сугерира дека претходните тврдења на американските медиуми биле неосновани и дека луѓето требало само „да си веруваат на збор“.
Потоа го користи терминот „Операција Факсиос“. Тоа е игра на зборови за името на американскиот портал Аксиос: „faux“ е француски збор што се користи на англиски јазик и значи „лажен“, „фејк“.
Со други зборови, тој го нарекува Аксиос „лажен Аксиос“, односно инсинуира дека медиумите објавуваат лажни или пропагандни информации.
Целата изјава е саркастична и служи за исмејување на извештаите на американските медиуми, а воедно се обидува да ги прикаже како дел од координирана информативна кампања против Иран.
