Италијанската левица која со години е поделена и без јасен лидер, конечно пронашла нова, свежа фигура која брзо прераснува во национална ѕвезда. Силвија Салис, 40-годишната поранешна олимписка фрлачка на кладиво и актуелна градоначалничка на Џенова, за само неколку денови се претворила во најсериозна потенцијална предизвикувачка на десничарската премиерка Џорџа Мелони.
Сè започнало месецов кога Салис организирала голема техно забава на Пјаца Матеоти во срцето на Џенова. Снимките на кои градоначалничката стои зад диџеј пултот брзо се проширија на социјалните мрежи и станаа вирални. Додека Мелони на почетокот од мандатот жестоко тргнала во сузбивање на илегалните рејв забави, Салис јавно ја славела електронската музика во самиот центар на градот.
Тој настан дојде во совршен момент за италијанската левица. Владата на Мелони претрпе тежок пораз на референдумот за реформата на правосудството во март, што на опозицијата ѝ даде нова надеж дека на следните парламентарни избори кои мора да се одржат најдоцна до крајот на 2027 би можела да ја преземе власта, пишува Политико.
„Бела чао татко ми мѝ ја пееше кога бев дете. Колку беше возбудливо да се пее вчера заедно со илјадници Џеновци на улиците и плоштадите на нашиот град“, напиша Салис на својот Фејсбук профил под снимката од 25 април по повод Денот на ослободување со спомен на ослободувањето на Италија од нацистичката окупација и фашизам.
Засега Салис внимателно одговара на прашањата за евентуална кандидатура за премиерка. Во интервју за дневниот весник „Ла Стампа“ на почетокот од март признала: „Би излажала кога би рекла дека не сум заинтересирана еден ден да се вклучам во националната политика“. Но оттогаш е значително повоздржана. Во ексклузивниот разговор со Политико истакнала дека моментално е фокусирана на својот град. „Гласаа за мене како градоначалничка, па очекуваат тоа и да го работам“, изјавила Салис. И покрај тоа притисокот расте. Нејзините следбеници на социјалните мрежи „постојано“ ѝ порачуваат да се „пробие“ на националната сцена.
Според последната анкета на агенцијата „Ното“, хипотетичката партиска листа на Силвија Салис би можела да освои околу 6,5 отсто од гласовите на национално ниво – и покрај фактот дека сè уште нема сопствена партија ниту службено ја најавила кандидатурата. Таков резултат би ја зголемил вкупната поддршка за левата коалиција на 45,5 отсто што е само малку под десничарската коалиција која има 46, 8 отсто, додека десничарските медиуми веќе секојдневно ја напаѓаат Салис.
Моменталните левичарски фаворити за прелиминарните избори се Ели Шлајн, лидерка на Демократската партија (PD), и Џузепе Конте од популистичкото Движење пет ѕвезди. Сепак, Салис јасно стави до знаење дека не сака да учествува на прелиминарните избори – ниту пак да гласа на нив. Наместо тоа, таа се залага за договор меѓу партиите, како оној што самата го постигна во Џенова кога ги обедини центарот и левицата и победи како умерен кандидатка.
Во интервју за Политико, таа сугерирала дека има сè што е потребно за да ја обедини левицата. На крајот на краиштата, таа ја добила трката за градоначалничка на Џенова како умерена кандидатка обезбедувајќи ја поддршката и од партиите на центарот и од левицата. „Како спортист, за да победиш во што било – регионално, национално, олимписко – мора да жртвуваш“ рекла таа. „Истото важи и за политиката. За да победиш, мора да останеш обединет, што значи компромис“, истакнала таа.
Поранешната врвна атлетичарка, која ја претставувала Италија во фрлање кладиво на Олимписките игри, сега е една од најпопуларните политичарки на северот од земјата. Нејзиниот подем покажува дека италијанската левица бара нова, свежа и помалку идеолошка фигура која може да им се допадне и на умерените гласачи.
