„Без оглед на нашите разлики и несогласувања, ние остануваме обединети во нашата посветеност на зачувување на демократијата, заштита на сите наши граѓани од закани и оддавање почит на храброста на оние кои секојдневно ги ризикуваат своите животи во служба на нашите земји“, им рече Чарлс на американските пратеници во ретко обраќање на заедничката седница на Сенатот и Претставничкиот дом, откако беше пречекан со овации по влегувањето со кралицата Камила.

Обраќањето на кралот се случи на вториот ден од четиридневната државна посета на САД, во напнато време во односите меѓу двете земји откако американскиот претседател Доналд Трамп постојано го критикуваше британскиот премиер Кир Стармер за она што тој го нарекува недоволна поддршка за војната со Иран.

„Не се впуштаме во овие извонредни потфати заедно од сентименталност“

„Денес доаѓам тука со најголема почит кон Конгресот на Соединетите Американски Држави, бедемот на демократијата, создаден да го претставува гласот на сите Американци и да ги промовира светите права и слободи“, рече Чарлс. Тој рече дека партнерството меѓу САД и Велика Британија е „поважно“ од кога било досега и дека „предизвиците со кои се соочуваме се премногу големи за која било нација да се справи сама“.

Кралот нагласи дека истата „непопустлива решителност“ што се виде по нападите на 11 септември 2001 година врз Соединетите Американски Држави е потребна за да се одбрани Украина и „нејзиниот извонредно храбар народ за да се обезбеди вистински праведен и траен мир“.

Тој, исто така, зборуваше за важноста на НАТО, истакнувајќи дека британско-американските „одбранбени, разузнавачки и безбедносни врски се тесно испреплетени, со односи што не се мерат со години, туку со децении“.

Тој, исто така, го истакна присуството на американските сили во Велика Британија и британските сили во Соединетите Американски Држави. „Ние не се впуштаме во овие извонредни потфати заедно од сентименталност, го правиме тоа затоа што тоа гради поголема заедничка отпорност за иднината“, рече тој.