Ги сакаме неговите живописни пристаништа, иновативната гастрономија и архитектурата која вешто балансира меѓу минималистичката функционалност и богатата историска естетика. Токму во тој контекст особено се истакнува една од најнеобичните и најживописните градби во градот: „Palads Teatret“, најголемото и најстарото кино во Копенхаген, кое повеќе од еден век предизвикува поделени мислења во јавноста.

Кога било штотуку отворено имало 1780 седишта и оркестар од 30 музичари

Денес овој раскошен комплекс има дури 17 сали, од кои најголемата може да прими 689 гледачи и вкупно 2600 седишта. Освен одличната понуда на филмови, киното има и неверојатна историја. Отворено е на малку необично место: во зградата на поранешната главна железничка станица на плоштадот Акселторв, која престанала да работи во 1911 година, по изградбата на новата станица.

Киното „Palads“ свечено било отворено на 18 октомври 1912 година. Тогаш имало 1780 седишта и оркестар од 30 музичари, со што станало најголем забавен центар во Скандинавија. Како што растела неговата популарност, киното многу брзо го надраснало просторот на старата железничка станица. Веќе во 1917 година првобитната зграда била урната, а на нејзино место никнала нова и посовремена градба, која во неокласицистички стил со барокни влијанија ја проектирале архитектите Андреас Клеменсен и Јохан Нилсен.

Во средината на 1970-тите му се заканувало затворање, а го спасил еден потег

Комплексот некогаш вклучувал и сала за танцување и ресторан, а на неговиот покрив во 1918 година била поставена скулптурата „Урсус и бикот“ на авторот Каи Нилсен. Истата била позлатена дури во 1949 година. Низ децениите киното „Palads“ постојано се менувало. Така, во 1955 година добило нова вентилација, теписи, седишта, ѕидни облоги од розово дрво и широко платно од 12 метри.

Но, во средината на 1970-тите киното се соочило со пад на посетеноста, што сериозно го загрозило неговиот опстанок. Спасот дошол во 1978 година, кога „Palads“, по примерот на париското кино „Marignan Concorde“, било поделено на 12 сали за во него истовремено да можат да се прикажуваат повеќе филмови. Тој потег постигнал огромен успех: киното за само една недела го посетиле речиси 58.000 луѓе.

Разиграната интервенција во сивиот и заспан град за некои била шок

Веќе во 1979 година во подрумот биле отворени уште пет сали, а ентериерот бил преуреден во сино-сиви тонови со црвени седишта. Надворешниот дел од зградата најголемата трансформација ја доживеал во 1989 година, кога уметникот Поул Гернес ѝ додал силни, впечатливи бои. Во тоа време Копенхаген бил прилично сив и заспан град, па оваа разиграна интервенција за дел од јавноста била вистински шок.

Зградата, која дотогаш била класично бела, била претворена во шарена, речиси надреална глетка што многумина го сметале за непотребен кич. Но, живите бои во меѓувреме станале неразделен дел од идентитетот на „Palads“. Во рамките на овој кино-комплекс во 1970-тите работеле и различни ноќни клубови. Најпознат меѓу нив бил „Daddy’s Dance Hall“, во кој во 1977 година настапил легендарниот англиски панк-рок бенд „Sex Pistols“.

Жителите на Копенхаген сакаат нивното омилено кино да го задржи оригиналниот изглед

Иако извесно време се размислувало киното „Palads“ да се замени со помодерен проект, планот наишол на силен отпор од јавноста и на крајот бил отфрлен.

Жителите на данската престолнина, кај кои ова кино буди силни и убави емоции, сметаат дека оригиналниот изглед на „Palads“ мора по секоја цена да се зачува. Едно е сигурно: ова легендарно кино никогаш не било само обична зграда — нека остане така и во иднина.