Главниот град на Грузија наскоро би можел значително да ја промени својата панорама, бидејќи организација поврзана со американскиот претседател Доналд Трамп планира изградба на луксузен облакодер од 70 ката во Тбилиси, што ќе биде највисоката градба во оваа држава.
Според „Волстрит џурнал“ (WSJ), проектот наречен „Трампова кула Тбилиси“ (Trump Tower Tbilisi) е замислен како комплекс со мешовита намена.
Како што се наведува, зградата ќе опфаќа луксузни станбени единици, ексклузивни малопродажни простори, како и хотелски содржини од највисока категорија.
За визуелниот идентитет и дизајнот е задолжена светски познатата архитектонска фирма „Генслер“ (Gensler), додека зад реализацијата стои конзорциум составен од водечките локални компании „Арчи груп“ (Archi Group) и „Бајограпи ливинг“ (Biograpi Living).
Локалните економски аналитичари оценуваат дека влезот на ваков звучен бренд би можел дополнително да го поттикне пазарот на недвижности во Грузија и покрај сложените геополитички околности во регионот.
Тбилиси во последните години се позиционира како регионален центар, а изградбата на ваков симбол на модерната архитектура би можела да привлече нови странски инвестиции.
Овој потег означува продолжување на интензивната меѓународна експанзија на брендот на семејството Трамп во 2026 година, пренесе „Ројтерс“.
Во февруари беше потпишан сличен договор во Австралија, вреден 1,5 милијарди австралиски долари, што го потврдува фокусот на организацијата кон пазарите во развој и престижните глобални локации.
