Руската „Volga“ се враќа на пазарот со моделите K50 и C50, кои се базираат на кинеските автомобили на компанијата „Geely“, косопственик на „Volvo“, а ќе се произведуваат во поранешните погони на „Volkswagen“ во Нижни Новгород.
Некогашниот симбол на советската елита и препознатливо возило на државните служби, брендот „Volga“ се обидува повторно да се врати на руската автомобилска сцена. По неуспешниот обид за оживување на брендот во 2024 година со помош на шасии од кинеската компанија „Changan“, компанијата сега претстави два нови модели – SUV K50 и лимузината C50.
„Препакуван“ SUV и лимузина
Сепак, ниту овојпат овие два модели не се домашни производи, туку станува збор за преименувани верзии на возила од кинескиот производител „Geely“. Оваа компанија е косопственик на брендови како „Volvo“, „Polestar“, „Proton“, „Smart“ и „Lotus“, а целосен сопственик е и на кинеските брендови „Lynk & Co“ и „Zeekr“, присутни и на нашето пазар, кои ги продава заедно со основниот бренд „Geely“.
Кога станува збор за соработката со „Volga“, „рускиот“ SUV модел K50 претставува влез на брендот во сегментот на SUV возила и е дизајниран врз база на моделот „Geely Monjaro“. Визуелните промени во однос на оригиналниот модел се минимални и се сведуваат речиси исклучиво на изменета предна маска со ознаки на „Volga“. Под хаубата ќе се наоѓа дволитарски турбо-бензински мотор со 238 КС, во комбинација со 8-степен автоматски менувач и погон на сите тркала.
Покрај SUV моделот, „Volga“ во понудата ја враќа и традиционалната лимузина под името C50. Овој модел се базира на кинескиот „Geely Preface“, чиј дизајн и технички решенија се речиси целосно задржани. Со исклучок на новото лого и решетката на ладилникот, C50 го задржува визуелниот идентитет кој потсетува на класичните европски и американски лимузини. Купувачите ќе имаат избор меѓу две варијанти на дволитарски бензински четирицилиндричен мотор – со 150 КС или 200 КС, во комбинација со 7-степен менувач со двојна спојка.
Ентериерот на моделот C50 исто така не носи значајни промени во однос на кинескиот оригинал. Внатрешноста ја одликуваат дигитална инструмент табла, вертикално поставен инфотејнмент екран и препознатлив волан со четири краци. Иако цените на новите модели сè уште не се официјално објавени, познато е дека производството ќе се одвива во поранешната фабрика на „VW“ групацијата во Нижни Новгород, каде што некогаш се склопуваа модели на „Škoda“ и „Volkswagen“.
