Успешно извлекување по драматична потрага

По соборувањето на авионот Ф-15Е Страјк Игл од страна на иранската противвоздушна одбрана, првиот пилот беше спасен веднаш, додека офицерот за вооружување остана исчезнат повеќе од еден ден. Трамп соопшти дека вториот член на екипажот има повреди, најверојатно здобиени при катапултирањето, но нагласи дека неговата состојба е стабилна. Иако претседателот тврди дека во мисијата нема загинати или ранети американски војници, Би-Би-Си известува дека дошло до директен „контакт“ и судир меѓу американските и иранските сили за време на извлекувањето.

Воздушни напади и жртви на теренот

Додека траеше операцијата, иранските државни медиуми објавија за воздушни напади во планинскиот предел на провинцијата Кохгилује и Бојер-Ахмад во југозападен Иран, каде што се верува дека се наоѓал американскиот офицер. Локалните власти потврдија дека во овие напади загинале најмалку четири лица, обвинувајќи ги САД и Израел за бомбардирањето. Засега не е официјално потврдено дали овие напади биле директно поврзани со мисијата за спасување.

Иран тврди дека соборил американски дрон

Иранската револуционерна гарда соопшти дека за време на потрагата по американскиот екипаж успеала да собори американски дрон во провинцијата Исфахан. Иако Вашингтон се уште не ги потврдил овие наводи, социјалните мрежи беа преплавени со видеоснимки на кои се гледа како ирански сили пукаат кон американски хеликоптери од типот Блек Хок. Трамп изјави дека во операцијата биле вклучени „десетици авиони“ опремени со најмоќното оружје на светот.

Потера со парична награда

Пред американските сили да стигнат до својот војник, иранската војска понуди награда од околу 60.000 долари за секој што ќе го фати американскиот офицер жив. Снимките покажуваат дека и стотици локални жители се вклучиле во потрагата по непријателските предели, но американските специјални единици успеале први да стигнат до него и да го евакуираат на безбедно.