Српскиот претседател Александар Вучиќ изјави дека изборите во земјата ќе се одржат до крајот на годината, со можност за нивно организирање до Видовден, 28 јуни.
Во интервју за телевизијата Информер, Вучиќ рече дека резултатите од неодамнешните локални избори во десет градови и општини покажале дека студентските листи немаат значителна поддршка од гласачите.
„Сè ќе биде мирно, ќе биде добро, немаат шанси. Фактот дека некој е лут е израз на целосна немоќ и очај. Изборите ќе бидат распишани до крајот на годината, можеби дури и до Видовден. Тие ги побараа, ќе видиме кога ќе се одржат. Што ќе каже народот, така ќе биде – ‘vox populi, vox dei’“, рече Вучиќ.
Тој додаде дека претставниците на студентските листи не ги објавиле резултатите во ниту една локална заедница во која учествувале на изборите, оценувајќи дека не се подготвени за изборниот процес.
Вучиќ, исто така, рече дека Советот на Европа и Европската Унија реагирале на инцидентите за време на локалните избори, но дека не ги именувале одговорните за насилството.
Како одговор на некои медиумски извештаи дека е во паника, Вучиќ одговори дека целта на неговото обраќање е да ги смири граѓаните.
Тој рече дека надлежните органи ќе продолжат да си ја работат својата работа и дека граѓаните наскоро ќе бидат информирани за дополнителни информации за, како што изјави, скриени детали во врска со настаните за време на изборите.
