Како што се приближуваат велигденските и летните празници, многу родители ќе бараат идеална дестинација за семеен одмор. Имајќи го тоа предвид, платформата за резервација на патувања „LateRooms“ направи нов „Индекс на семејни патувања“, кој ги рангира најлесните градски одмори во Европа за патници од Велика Британија со бебиња, мали деца и постари деца, пренесе „Јуроњуз“.

Индексот ги анализира факторите што се најважни за семејните патувања, вклучително и просечното времетраење на летовите од Велика Британија, времето за трансфер од аеродромот, можноста за движење пеш и пристапноста, бројот на атракции приспособени за деца и достапноста на сместување погодно за семејства.

Копенхаген на врвот на листата

Според индексот на „LateRooms“, Копенхаген е рангиран како „најлесна и најпријатна“ дестинација за семеен градски одмор, благодарение на едноставното движење низ градот, разновидното сместување и бројните содржини за семејства. Возењето со метро од аеродромот до центарот на градот трае околу 15 минути, па патувањето е „брзо и едноставно дури и со изморени мали деца“.

Кога ќе пристигнете, Копенхаген е лесен за истражување, бидејќи градот има оценка 99/100 кога станува збор за движење пеш. Тоа значи дека многу атракции можат да се „обиколат без долги патувања или комплициран превоз“.

Детските игралишта и просторите покрај вода го прават Копенхаген „една од најприемчивите дестинации за семејства во Европа“, се наведува во индексот, а самиот град е „полн со содржини за семејства“.

Меѓу најинтересните места се „Tivoli Gardens“, „кој бил инспирација за Дизниленд“, и шареното пристаниште „Nyhavn“, кое „делува како сцена од сликовница за опуштена попладневна прошетка“.

На второто место е Берлин, кој е најдобар кога станува збор за семејни атракции и „една од најдобрите дестинации во Европа за детска забава“. Германската престолнина има повеќе од 200 активности погодни за семејства, што е доволно за исполнет викенд.

Семејствата можат да ги посетат Берлинската зоолошка градина, интерактивни музеи како „Deutsches Technikmuseum“ или да се опуштат во пространиот парк „Tiergarten“.

На третото место е Барселона, која е најдобра комбинација од плажа и град, нудејќи „еден од најдобрите споеви на разгледување и престој на отворено за семејства“.

Градот има повеќе од 400 атракции погодни за семејства, што го прави една од најбогатите дестинации по број на активности.

Според индексот на „LateRooms“, десетте најлесни европски градови за семеен одмор се:

✈️Копенхаген, Данска: вкупно најдобар за семеен одмор;

✈️Берлин, Германија: најдобар за семејни атракции;

✈️Барселона, Шпанија: најдобра за комбинација од плажа и град;

✈️Фиренца, Италија: најдобра за опуштени културни патувања;

✈️Амстердам, Холандија: најдобар за кратки семејни излети;

✈️Валенсија, Шпанија: најдобра за семејни активности;

✈️Базел, Швајцарија: најдобра компактна дестинација за семејства;

✈️Краков, Полска: најдобар за поволен семеен одмор;

✈️Прага, Чешка: најдобар за бајковит амбиент;

✈️Виена, Австрија: најдобар за музеи приспособени за деца.