Советот за безбедност на Обединетите нации усвои резолуција со која се осудуваат нападите на Иран врз земјите од Персискиот Залив и Јордан и се бара Техеран веднаш да ги прекине непријателствата. Резолуцијата, спонзорирана од Советот за соработка во Персискиот Залив (GCC) и поддржана од 135 други земји-членки, беше усвоена со 13 од 15 членки кои гласаа „за“, а две беа воздржани, објави Ал Џезира.
Ниту една земја не гласаше против. „Поддршката беше огромна. Имаше 13 гласа „за“ во Советот и две воздржани“, објави Габриел Елизондо од седиштето на ОН во Њујорк.
„Кина и Русија се воздржаа, но значајно е што тие не го искористија своето право на вето за да ја блокираат оваа резолуција, веројатно затоа што доби огромна поддршка, не само во Советот за безбедност, туку и од други земји-членки“, објасни Елизондо.
„Веруваме дека ова е најголемиот број земји кои некогаш поддржале нацрт-резолуција на Советот за безбедност“, додаде тој. Резолуцијата ги осудува иранските напади, бара итен прекин на непријателствата и изразува жалење за таргетирањето на инфраструктурата како што се пристаништата и енергетските капацитети во регионот на Персискиот Залив од страна на Техеран.
„Резолуцијата е многу јасна и сега е дел од меѓународното право. Прашањето е дали Иран ќе се придржува до неа. Ќе дознаеме во наредните часови и денови“, заклучи Елизондо.
