Документарецот го реконструира случајот кој со месеци бил исполнет со нејаснотии и покажува како семејството, незадоволно од текот на истрагата започнало да го составува мозаикот од она што се случило.

Невообичаени пораки по излегување од болница

Сè започнало во август 2023 година, кога Естер за време на престојот во хостел во Аликанте го запознала Хозе Хурада Монтиљо, креатор на содржини кој на социјалните мрежи се претставувал како патник и туристички водич. Двајцата отишле на долга прошетка, по што Естер завршила во болница поради отечена нога и силна главоболка.

Недолго откако била отпуштена од болница, нејзината мајка почнала да добива чудни пораки од телефонот на Естер. Во нив пишувало дека Естер останала без пари и дека заминува за Буенос Аирес за да започне нов живот. Семејството веднаш се посомневало. Естер со години живеела номадски живот и често патувала, но никогаш не би го прекинала контактот со своите најблиски, а особено не би ги оставила своите две кучиња.

Семејството не верувало дека заминала по своја волја

Додека истражителите првично се сомневале дека Естер можеби доброволно исчезнала, нејзината мајка и сестра не верувале во тоа. Тврделе дека таа редовно била во контакт со семејството и дека имала планови за месеците што следувале. Токму затоа самите почнале да ги истражуваат околностите на исчезнувањето и човекот кој бил меѓу последните што биле со неа.

Тој потег ги довел до шокантно откритие. Се покажало дека Монтиља не е безопасен патник и инфлуенсер како што се претставувал на социјалните мрежи, туку човек со сериозно криминално минато.

Темното минато на човекот од ТикТок

Како што открива серијата, Монтиља претходно бил осуден за повеќекратни убиства и поминал години во затвор. И покрај ова, тој изградил сосема поинаква слика за себе на социјалните мрежи, објавувајќи видеа од своите движења и содржини што оставале впечаток на пристапна и пријателски настроена личност.

Токму овие дигитални траги подоцна станале важен дел од сложувалката. Документарецот покажува како објавите, пораките, видеата и податоците за геолокација помогнале во реконструкцијата на последните денови на Естер и го насочиле вниманието кон човекот кој последен пат бил со неа.

Првата епизода се фокусира на исчезнувањето на Естер и очајните обиди на семејството да најде одговори. Втората епизода ја проширува приказната и го поставува прашањето за минатото на Монтиља, како и можните врски со други злосторства. Во срцето на целата приказна не е само полициската истрага, туку и упорноста на семејството, кое не го прифатило објаснувањето дека Естер едноставно одлучила да исчезне.

Трагичен расплет

Потрагата по Естер на крајот завршила трагично. Нејзините останки биле пронајдени неколку месеци по нејзиното исчезнување, а случајот добил уште потемна димензија. Монтиља негирал одговорност, но против него биле покренати и обвиненија за убиството на Естер.

Документарецот го прикажува целиот случај низ перспективата на семејството, кое од првиот ден тврдело дека нешто не е во ред. Токму затоа серијата остава силен впечаток: не станува збор само за злосторството, туку и за борбата на најблиските да докажат дека личноста што ја сакаат не „исчезнала“ тукутака, туку дека ѝ се случило нешто многу полошо.

Реакции на гледачите

По објавувањето документарецот предизвика лавина од коментари на социјалните мрежи. Гледачите коментираа на Икс дека приказната длабоко ги трогнала и ги налутила.

„Ужасно… откако го гледав, се чувствував навистина лошо“, „Многу ми е жал за неа и нејзиното семејство“, „Нема сомнение дека овој човек го направил тоа“, „Полицијата е навистина бескорисна во некои делови од светот“, „Имам толку многу прашања за овој случај и многу сум лута“, „Оваа приказна ме шокираше“, се дел од коментарите.