Според најновите бројки од Меѓународната организација за миграција (ИОМ), во Европа се регистрирани повеќе од 39.000 случаи на трговија со луѓе во последните две децении. Експертите на ИОМ предупредуваат дека реалниот број е веројатно многу поголем поради недоволно пријавување и неоткривање на случаите, објавува „Еуроњуз“.
Податоците за периодот 2002-2022 година покажуваат дека жртвите во Европа главно доаѓаат од девет земји. Повеќе од 19.000 жртви биле од Украина, по што следуваат Молдавија со 10.464 и Белорусија со 4.286 случаи. Јулија Саченко, експерт за борба против трговијата со луѓе и заштита на децата, истакна дека војните ги охрабруваат ваквите злосторства.
„Војната секогаш создава плодна почва за ширење на злосторства против човештвото“, напиша таа на LinkedIn по состанокот на Советот на Европа. „Неодамнешните откритија покажуваат дека во текот на последните четири години од војната, најмалку 13 лица станале жртви на трговија со луѓе во земјите што граничат со Украина.“
Жртвите се идентификувани во 69 европски земји, а најголем дел е регистриран во Украина (8.413) и Молдавија (5.866). Жените сочинуваат повеќе од три петтини од сите жртви, што е приближно двојно повеќе од мажите, а идентификувани се 27 трансродови жртви. Меѓу жртвите, 85 проценти се возрасни, најчесто на возраст меѓу 30 и 38 години, додека 15 проценти се деца.
Речиси половина од жртвите биле експлоатирани една година или помалку. Половина од нив биле подложени на принудна работа, најчесто во градежништвото (52%) и земјоделството (29%), додека 48% биле жртви на сексуална експлоатација, најчесто принудна проституција и производство на порнографска содржина.
Трговците со луѓе користат психолошка, физичка и сексуална злоупотреба за да ги контролираат своите жртви. Вообичаените тактики вклучуваат ограничување на пристапот до пари, одземање на слободата на движење и негирање на потребната медицинска нега. Податоците на ИОМ покажуваат дека во огромното мнозинство случаи сторителите не се блиски со жртвите – само 10 проценти биле нивни пријатели.
Најголемиот дел од сторителите се брокери за вработување, изведувачи, формални работодавци и шверцери. Интимните партнери сочинувале еден процент, а членовите на семејството два проценти од сторителите.
