Цените на нафтата пораснаа за повеќе од 10 проценти минатата недела поради ескалацијата на конфликтите во регионот.
Конфликтот меѓу Соединетите Американски Држави и Израел против Иран би можел да предизвика значителен скок на инфлацијата во Еврозоната и да го забави економскиот раст, предупреди главниот економист на Европската централна банка (ЕЦБ) Филип Лејн во интервју за „Фајненшл тајмс“.
„Скокот на цените на енергијата врши притисок врз инфлацијата, особено во блиска иднина, а таков конфликт би бил негативен за економската активност“, изјавил Лејн, додавајќи дека обемот на влијанието ќе зависи од ширината и времетраењето на конфликтот.
Претходните анализи на ЕЦБ покажуваат дека трајниот скок на цените на нафтата, каков што веќе се забележува поради војната, би можел да ја зголеми инфлацијата за околу 0,5 процентни поени и да го намали растот за 0,1 процентен поен, пишува „Танјуг“.
Цените на нафтата веќе пораснаа за повеќе од 10 проценти минатата недела поради ескалацијата на конфликтите во регионот.
Инфлацијата во Еврозоната моментално е 1,7 проценти, под целта на ЕЦБ од два проценти, што укажува дека мал скок на цените на енергијата веројатно нема да предизвика непосредни промени во монетарната политика.
Лејн додал дека ЕЦБ се обидува да гледа подалеку од краткорочните флуктуации на цените на енергијата, сè додека тие не влијаат на долгорочните инфлациски очекувања и базичната инфлација.
Пазарите моментално очекуваат депозитната каматна стапка на ЕЦБ да остане на два проценти во текот на целата година.
