Постоеле само три негови фотографии. Сите биле типични фотографии на „DEA“, направени на почетокот на 1990-тите. Прво бил фатен со марихуана. Потоа како продава хероин на тајни полицајци во бар во Сан Франциско. Имаше нешто повеќе од 20 години и заработуваше од нелегално шверцување во САД.

Секогаш наоѓал начин да се врати. Но, откако отслужил неколку години затвор, решил да остане во Мексико. Оттогаш повеќе нема фотографии од криминалната кариера што го доведе Немесио Осегуера Сервантес до позицијата шеф на најмоќната мафија — "Jalisco New Generation Cartel" (CJNG), која го револуционизирала криминалниот бизнис и надвор од дрогата: изнуди, грабежи, трговија со мигранти — со мрежа низ целата земја и голем дел од САД, способна за убиства на судии, политичари и воени лица, парализирање цели градови, ангажирање странски платеници и уривање воени хеликоптери со топови. Ел Менчо беше мексиканска цел број еден и најбаран наркобос од страна на САД, водејќи „една од најопасните транснационални криминални организации во светот“.

Кој беше Ел Менчо

Приказната за Ел Менчо започнува според типичните обрасци на мексиканската трговија со дрога. Син на сиромашно земјоделско семејство од Мичоакан, област позната по одгледување афион и марихуана, по младешките авантури од другата страна на границата го започнал својот подем од дното како обичен платен убиец за една фракција поврзана со картелот Синалоа, матичната организација на мексиканската трговија со дрога.

Со комбинација од предавства и стратешки сојузи, во 2009 година го предал својот шеф на таканаречениот картел Миленио за да ја стекне наклонетоста на еден од водачите на Синалоа и да стане негов доверлив човек. Така во 2010 година настанал картелот "Jalisco New Generation" како едно од вооружените крила на мафија на Синалоа.

Само една година подоцна следувал нивниот најзначаен напад. На 20 септември 2011 година, околу 17 часот, шест комбиња го блокирале сообраќајот на автопат во Бока дел Рио, едно од најпопуларните туристички подрачја во Веракруз. Ги отвориле товарните врати и на асфалтот оставиле 35 тела. Наводно станувало збор за членови на Лос Зетас, озлогласена група составена од поранешни елитни војници кои во тоа време војувале против картелот Синалоа. Нападот им го донел прекарот „Los Matazetas“ (убијци на Зетас).

Распад на сојузот

Сојузот со Синалоа не траел долго. По смртта на неговиот шеф Игнасио Коронел во полициска операција, Ел Менчо повторно бил обвинет за предавство, што дополнително го зацврстило неговиот имиџ на студен, пресметлив и пред сè дискретен човек, далеку од луксузот и разметливоста што довеле до пад на многу наркобосови. Полициските извештаи нагласуваат дека растот на неговата мафија бил поттикнат од способноста да го искористи вакуумот на моќ што го оставиле посилните картели. Додека владите во последните 20 години се фокусирале на Синалоа, Зетас или Витезите Темплари, луѓето на Ел Менчо ги пополнувале тие празнини и учеле од грешките на паднатите босови.

Од старите гангстери од пацифичкиот брег ја научил важноста на преговарањето за моќ и создавањето мрежи со политичари. Од Зетас го презел екстремното насилство како средство за преговарање. Од соседите во Мичоакан научил техники на нарко-пропаганда и ширење на нови синтетички дроги, особено метамфетамин. Но можеби неговото најголемо дело била формулата за модерна, децентрализирана мафија што функционира како франшиза — бренд далеку од старите правила на подземјето, кое порано се фокусирало само на дрога, а ги исклучувало изнудите и киднапирањата.

Последните години на социјалните мрежи често се појавуваа видеа од групи во паравоена опрема, вооружени со автоматски пушки и во камиони обложени со железни плочи како импровизирани тенкови. Логото на "CJNG" го носеа на градите додека го славеа Господарот на петлите — уште еден прекар на Ел Менчо, произлезен од неговата страст кон борби со петли.

Ова демонстрирање на сила било придружено со пропагандни активности, особено долж границата меѓу Мичоакан и Халиско, неговите упоришта. Целта била создавање легитимитет и општествена база во занемарените градови, често со ветувања дека под негова власт ќе престанат заканите и изнудите од други групи.

Пропаганда и екстремно насилство

Владеењето на Ел Менчо и неговото гонење од државата биле обележани со низа напади и одмазди. Во 2015 година, кога почнал да се наметнува како наследник на речиси митската фигура Ел Чапо, смртта на еден негов човек од рацете на војската била проследена со заседа врз воен конвој во која загинале 15 офицери. Апсењето на неколку платени убијци било проследено со блокади на патишта низ Халиско и уривање воен хеликоптер со ракетен фрлач.

Екстрадицијата на неговиот син Рубен Осегуера, познат како Ел Менчито, во 2020 година била проследена со атентат врз судијата што го водел случајот. Тој бил убиен во својот дом во Колима, област под контрола на картелот и важна рута за хемиски прекурсори од пацифичките пристаништа.

Истата година се случило и убиството на поранешниот гувернер на Халиско, Аристотелес Сандовал, во тоалет на бар во Пуерто Ваљарта, туристичкото срце на регионот.

Една од пресвртниците се случила истата година кога тогашниот шеф на полицијата во Мексико Сити, Омар Гарсија Харфуч, денес федерален секретар за безбедност, се возел низ Ломас де Чапултепек, една од најелитните населби во главниот град.

Група од 28 платени убијци му го блокирала патот и четири минути испукала повеќе од 100 куршуми од воени пушки. Харфуч преживеал, но демонстрацијата на сила на "CJNG" во срцето на политичката и економската моќ на Мексико претставувала редок предизвик дури и за земја навикната на насилство.

Пред големата операција што го стави во центарот на вниманието, полициското досие на Ел Менчо било чисто до 2013 година. Првите истраги ги започнала полицијата во Халиско по смртта на готвач кој исчезнал откако заминал да послужи храна на забава. Следувала уште една истрага, овој пат за смртта на неколку рибари.

Тогаш почнал да се појавува уште еден столб на неговиот бизнис — перењето пари. Купувал ресторани, поставувал свои сметководители и им дозволувал да продолжат со работа. Друга истрага од 2015 година укажувала и на шема за идентификација на перспективни студенти по право и економија, доделување стипендии и нивно вработување по дипломирањето.

Обвиен во митови и легенди како секој криминалец од негов калибар, се ширеле гласини дека боледува од бубрежна болест, што придонело за неговиот низок профил и ретки движења. Во пограничните планини меѓу Мичоакан и Халиско дури се зборувало дека имал и сопствена болница каде ги лекувал своите здравствени проблеми.

Последните години стратегијата на американското правосудство беше насочена кон него преку неговото семејство. Неговиот брат Антонио, познат како Тони Монтана, беше уапсен во 2022 година и неодамна екстрадиран во САД.

Неговиот син Рубен, познат како Ел Менчито, минатата година беше осуден во Вашингтон за трговија со дрога. Зетот Кристијан Фернандо Гутиерез, познат како Ел Гвачо, член на раководството на "CJNG", беше уапсен минатиот ноември во Калифорнија откако ја лажирал сопствената смрт за да избегне апсење.

Од неговиот најтесен круг остана само сопругата Росалинда Гонзалес Валенсија, со прекар Ла Хефа („Шефицата“), клучна фигура во финансискиот апарат на мафијата.

Двајцата биле уапсени двапати во Мексико и двапати пуштени на слобода. И двајцата потекнуваат од истиот град во Мичоакан, Агвилија, но се запознале како млади мигранти во Калифорнија. Се венчале кон крајот на 1990-тите по враќањето во Мексико, а тој брак веќе ја навестувал амбицијата и пресметливоста на Ел Менчо.

За разлика од сопругот, во вените на Ла Хефа течела „сина крв“ од семејната сага со долга историја во мексиканската трговија со дрога — браќата Валенсија, познати и како "Los Cuinis", кои по венчавката станале едно од најмоќните крила на мафијата што ја основал Господарот на петлите.