Обезбедувањето го забележало кај северната порта, носејќи пушка и канистер со бензин.

Агентите на тајните служби му наредиле да ги спушти предметите. Мажот го спуштил канистерот, но ја подигнал пушката во положба за пукање.

„Тогаш заменик-шерифот и двајцата агенти го застрелале и ја неутрализирале заканата. Мажот починал на лице место“, кажа Рик Бредшо, шериф на округот Палм Бич.

Сè уште не е јасно колку куршуми биле испукани, а шерифот рече дека тоа е дел од истрагата.

Во моментот, Доналд Трамп бил во Белата куќа, а неговата сопруга Меланија била со него.

Допрва ќе бидат објавени повеќе детали за идентитетот на осомничениот поврзан со инцидентот.

Портпаролот на Тајната служба, Ентони Гуглиелми, изјави дека осомничениот е од Северна Каролина. Неговото семејство го пријавило како исчезнат пред неколку дена.

Според зборовите на Гуглиелми, истражителите веруваат дека тој ја напуштил Северна Каролина и се упатил кон југ, при што набавил сачмарка. Кутија за оружје била пронајдена во неговото возило.

Осомничениот со автомобил поминал низ северната порта на Мар-а-Лаго во моментот кога друго возило излегувало од комплексот.

Истражителите работат на изработка на психолошки профил, а мотивот сè уште се истражува. Тајната служба претходно соопшти дека неговиот идентитет нема да биде објавен додека не бидат известени членовите на семејството.

На прашање за време на претходната прес-конференција дали лицето ѝ било познато на полицијата, шерифот на округот Палм Бич, Рик Бредшо, изјави дека засега не е „познато“.

Се огласи Белата куќа

Белата куќа се огласи за утринскиот инцидент на имотот на американскиот претседател Доналд Трамп на Флорида, каде што обезбедувањето застрела и уби вооружен маж.

„Среде ноќта, додека повеќето Американци спиеја, Тајната служба на Соединетите Американски Држави брзо и решително неутрализираше луда личност, вооружена со пиштол и канистер со гориво, која упадна во домот на претседателот Трамп“, рече портпаролката на Белата куќа, Каролин Левит.

Објавен идентитетот на младиот човек кој вооружен упаднал на имотот на Трамп

Мажот кој смртно настрадал во Мар-а-Лаго бил 21-годишниот Остин Т. Мартин од Камерон, во сојузната држава Северна Каролина, потврдиле повеќе извори за „CBS News“, американскиот партнер на „BBC“.

Властите наведуваат дека тој носел сачмарка и канистер со гориво кога влегол во Мар-а-Лаго, при што успеал да влезе во комплексот во момент кога еден гостин излегувал.

Семејството на Мартин го пријавило неговото исчезнување дури вчера, а надлежните истражуваат дали оружјето го купил за време на патувањето од Северна Каролина кон Флорида, пишува „CBS“.