Ова е само еден од низата нивни експерименти, во кои претходно споредувале веганска и месна исхрана, како и режими богати со јаглехидрати и масти, пишува „Unilad“.

Иста количина калории, различни резултати

Клучната разлика во ова истражување не била во видот на храната, туку во распоредот на оброците. Двајцата браќа внесувале меѓу 2.500 и 3.000 калории дневно, што е препорачаниот дневен внес за активен маж.

Сепак, Хуго морал сите оброци да ги изеде во рок од осум часа, додека преостанатите 16 часа постел. Рос, од друга страна, калориите ги внесувал во текот на 16 часа дневно, па имал значително поголема слобода во распоредот на оброците.

Предизвици на наизменичниот пост

Иако губењето килограми со толкав внес на калории може да изгледа како идеално решение, Хуго истакнува дека ваквиот режим имал и свои недостатоци. „Јадев околу 10 или 11 часот наутро, а последниот оброк ми беше околу 6 или 7 навечер“, објаснил тој. Најголемиот проблем бил да се внесе доволна количина храна во толку краток временски период. „Беше навистина тешко. Искрено, едвај успевав да стигнам до зададените 2.500 до 3.000 калории бидејќи практично мора да јадете на секои два часа“, додал Хуго.

Дополнителен предизвик бил и социјалниот живот. Бидејќи по одредено време не смеел да јаде, вечерните излегувања со пријателите значеле дека не може ниту да јаде ниту да пие. Својот режим на крајот го опишал како „прилично грозен“, а обидот да внесе 3.000 калории во краток рок како „проклето тежок“.

Што јаделе?

Менито на Хуго најчесто се состоело од пржени јајца и тост или овесна каша со јаткасти плодови и бобинки за појадок. За ручек јадел сардини со ориз и зеленчук, додека вечерата била обилен оброк богат со јаглехидрати и протеини. За да ја достигне калориската цел, често пиел и протеински напитоци.

За разлика од него, Рос имал значително пофлексибилна исхрана. За појадок можел да јаде тост со џем, а главните оброци вклучувале „риба, зеленчук, црвено и бело месо“ како и „многу јадења со тестенини“. Во неговата исхрана повремено се вклопувале и јадења како пица.

Дали би го повториле експериментот?

И покрај тешкотиите, Хуго изјавил дека повторно би се одлучил за пост доколку главната цел му е намалување на телесната тежина. Со него се согласил и Рос, кој потврдил дека и двајцата и претходно имале успех со ваков режим. „Постот на двајцата ни одговара прилично добро“, рекол Рос и додал дека „подобро функционираат“ кога постат.

„Инаку јадеме храна со повеќе масти, како маслиново масло, сирења и помасно месо. Така не јадеме големи количини, а сепак внесуваме доволно калории“, објаснил тој.