Вечерашниот „Супер Боул“ ќе биде спектакл не само поради натпреварот меѓу двата најдобри НФЛ тима — „Њу Ингланд Патриотс“ и „Сиетл Сихокс“ — туку и поради сè што се случува во текот на целата недела, како и на самиот ден на натпреварот. Како и обично, се очекува овогодишниот „Супер Боул“ да урне бројни досегашни рекорди.

Очите на целиот свет ќе бидат насочени кон Санта Клара во Калифорнија, каде на импресивниот „Levi’s Stadium“ ќе се одигра „Super Bowl LX", шеесеттото издание на најголемиот спортски и телевизиски настан во Соединетите Американски Држави. Американците се едноставно опседнати со овој настан. За нив тоа е повеќе од спорт — начин на живот, забава, спектакл. „Супер Боул“ одамна ги надмина рамките на спортот; тоа е глобален феномен кој спојува врвен американски фудбал, огромни финансиски суми и забавен спектакл за кој ќе се зборува со месеци.

Меѓу 20 и 25 милиони Американци нема да дојдат на работа во понеделник

Во борбата за престижниот трофеј „Vince Lombardi“ ќе се соочат шампионите на двете конференции, споменатите Сиетл Сихокс и Њу Ингланд Патриотс, во реприза на едно од најдраматичните финалиња во историјата на НФЛ.

Натпреварот треба да започне околу половина час по полноќ во понеделник (Arena Sport 1), но има многу моменти пред, за време на полувремето и по натпреварот кои едноставно се неизбежни. Поради овој дуел се проценува дека меѓу 20 и 25 милиони вработени Американци нема да се појават на работа во понеделник, додека уште дваесетина милиони ќе доцнат.

Враќање на старите ривали и приказна за пресврт

Овогодишниот „Супер Боул“ носи приказна каква што само спортот може да напише. И Сихикс и Патриотс минатата сезона не се пласираа во плејофот, а нивното враќање на најголемата сцена претставува еден од најневеројатните пресврти во модерната ера на НФЛ. Обложувалниците пред почетокот на сезоната им даваа минимални шанси, но двата тима, со скор 14-3 во регуларниот дел, ги замолкнаа сите критичари.

„Супер Боул“ е настан каде што се вртат милиони и милијарди, но наградите за поединечни играчи и натаму се во стотици илјади. Според правилата на колективниот договор на лигата, секој играч од победничкиот тим ќе добие 178.000 долари, додека играчите од поразениот тим ќе заработат по 103.000 долари. Сепак, кога ќе се соберат наградите за целиот тим, сумата достигнува милиони, бидејќи секој состав брои дури 53 играчи. Покрај овие основни премии, многумина од нив имаат и дополнителни бонуси договорени независно од овој колективен договор.

Њу Ингланд Патриотс, предводени од тренерот на годината Мајк Врабел и младиот квотербек Дрејк Меј, доживеаја целосна ренесанса по неколкуте послаби сезони што следуваа по заминувањето на легендарната династија Брејди-Беличик. Меј, со само 23 години, ќе стане вториот најмлад квотербек што започнал Супер Боул, а неговата смиреност и прецизност го трансформираа нападот на Патриотс во втор најефикасен во лигата. Патот до финалето им беше тежок, со победи над три од петте најдобри одбрани во плејофот, со што ја докажаа својата ментална цврстина.

Од друга страна, Сиетл Сихокс пристигнуваат во Калифорнија како шампиони на NFC, носени од одлична одбрана која примила најмалку поени во целата лига. Под водство на тренерот Мајк Мекдоналд тимот доби нова енергија, а квотербекот Сем Дарнолд, по години минати во различни клубови, конечно заигра на нивото што се очекуваше кога беше избран како трет пик на драфтот во 2018 година. Ѕвезда на нападот е ресиверот Џејсон Смит Енџигба, кој со 1.793 освоени јарди беше најдобар во лигата и се надева на продолжување на неверојатната серија: секој од претходните четворица играчи што ја предводеле лигата по освоени јарди и играле Супер Боул на крајот ја освоиле титулата. Интересно е што ова е реприза на „Super Bowl XLIX" од 2015 година, кога Патриотс победија со 28-24 во едно од највозбудливите финалиња досега. Иако во составите нема ниту еден играч од тој натпревар, ривалството остана, а влоговите се поголеми од кога било.

Бед Бани го предводи спектаклот тежок над 10 милиони долари

Како и секоја година, музичкото шоу на полувремето привлекува еднакво, ако не и поголемо внимание од самиот натпревар. По три години доминација на мегапопуларната пејачка Тејлор Свифт, Супер Боул сега има нова ѕвезда. Карди Би пристигна во градот и според американските медиуми, поточно „Yahoo.com“, таа треба да биде гостинка на сцената со раперот Бед Бани, кој е најавен како главен изведувач на полувремето. Фановите на Тејлор Свифт, особено оние што го следат Тревис Келце и Чифс, веројатно се разочарани што нивниот тим не успеа четврти пат по ред да стигне до финалето.

Но љубителите на спектакуларни настапи нема да имаат причина за незадоволство. Карди Би, најнаградуваната и најпознатата раперка на сите времиња, сега е во врска со Стефон Дигс, ѕвезда на Њу Ингланд Патриотс, со кого има син. Нејзиниот гламур, кој за време на плејофот ги освежуваше стадионите, не помина незабележано. Сега останува да се види дали продукцискиот тим на преносот ќе ѝ го овозможи на Карди Би истиот третман што го добиваше Тејлор Свифт.