Круната на француската царица Евгенија е значително оштетена откако крадците, во бегство, ја испуштиле за време на провалата во музејот Лувр во октомври минатата година. Од музејот велат дека нејзината целосна реставрација е можна.
Кражбата на музејскиот накит е проценета на 88 милиони евра.
Музејот ги објави првите фотографии од круната по кражбата, наведувајќи дека таа е значително деформирана откако крадците се обиделе да ја извадат низ отворот што го исекле во нејзината стаклена витрина.
На круната ѝ недостига еден од осумте златни орли кои ја украсувале, но ги задржала своите 56 смарагди и сите освен 10 од вкупно 1.354 дијаманти.
Се додава дека круната од 19-oт век ќе биде вратена во првобитната состојба.
Кражбата се случила на 19 октомври, а при провалата бил користен украден механички лифт монтиран на возило. Двајца крадци влегле внатре така што со електрични алати пробиле прозорец.
Потоа им се заканувале на чуварите, кои го евакуирале подрачјето. Обвинителите изјавиле дека крадците биле внатре помалку од четири минути, пред да побегнат на два скутера.
Полицијата уапсила четири лица осомничени за кражбата, но организаторот не е пронајден, ниту пак украдениот накит.
