Едно од најпознатите места на американската туристичка мапа, „Булеварот на славните“ во Лос Анџелес, деновиве се најде во исклучително незавидна улога - според нова студија, тој е прогласен за една од „најлошите“ туристички атракции во светот.

Зошто?

Откако биле анализирани „101 најпопуларни атракции во светот“, земајќи ги предвид оцените на „Google“, застапеноста на „TikTok“, пристапноста до аеродромите, безбедноста во земјата и квалитетот на локалното сместување, експертите од туристичката компанија „Slasher“ го рангираа „Булеварот на славните“ на самото дно на листата, како најлоша атракција во светот.

„Патеката на славните“ се протега по должината на Холивуд булеварот и улицата Вајн и се состои од повеќе од 2.800 ѕвезди вградени во тротоарот. Секоја од нив е посветена на луѓе кои се истакнале во филмот, телевизијата, музиката, радиото и настапите во живо, како и на други големи имиња од историјата и културата, меѓу нив и Нил Армстронг.

Но, како што истакнуваат аналитичарите, популарноста не мора нужно да се спои со квалитет на искуството. Нивниот извештај истакнува дека „Патеката на славните“ има многу ниска оцена, а исто така е критикувана и поради безбедносен аспект.

„Сместена на приближно 37 километри од аеродромот LAX, Патеката на славните имаше најниска оценка на „Google“, како и најниска безбедносна оцена“, се наведува во анализата.

Поделени реакции на посетителите

Сличен впечаток е видлив и на „TripAdvisor“, каде што „Патеката на славните“ моментално има просечна оцена од 3,4 од максимум пет ѕвездички и е на 64-то место на листата на најпопуларни активности во Лос Анџелес. Мислењата на посетителите се поделени.

Еден рецензент напишал дека „Патеката на славните“ е далеку од гламурот што често се прикажува на телевизија и во филмовите и дека целата област се чувствувала небезбедно за време на неговата посета, поради што не би препорачал да се доаѓа со мали деца.

Други пак, биле поблаги: „Да, малку е кич, но ако сте турист, зошто да не? Забавно е да се погледнат имињата на ѕвездите и да се ѕирне во продавниците за сувенири. Готово, прецртајте ја листата.“

Некои заклучиле дека „Патеката на славните“ сè уште вреди да се посети, барем еднаш во животот, единствено поради нејзината иконографија и фактот дека низ децениите стана еден од симболите на Холивуд. Но, имало и такви кои отворено предупредуваат дека не треба да очекувате сјај и гламур: наместо филмска бајка, ќе ве пречека просечен градски кварт полн со скапи продавници за сувенири.

Топ 10 „најлоши“ туристички дестинации

Холивудска патека на славните, Лос Анџелес, САД (2,67/10)

Мртвото Море, границата меѓу Јордан и Израел (3,51/10)

Големата чаршија, Истанбул, Турција (3,86/10)

Кинески ѕид, Кина (4,43/10)

Пристаниште Викторија, Хонг Конг (4,68/10)

MONA (Музеј на стара и нова уметност), Тасманија, Австралија (4,80/10)

Стоунхенџ, Вилтшир, Велика Британија (4,85/10)

Дизниленд Париз, Марн ла Вале, Франција (4,90/10)

Планината Килиманџаро, Танзанија (4,98/10)

Историското светилиште Мачу Пикчу, регионот Куско, Перу (5,00/10)