Стареењето не е болест, истакнува професорот Михаел Денкингер, претседател на Германското здружение за геријатрија.
Секако дека постојат болести поврзани со возраста, но професорот смета дека прогласувањето на самото стареење за патолошки процес е „многу опасно“.
„Тоа е став кој сигурно не му прави добро на нашето општество. Оној што размислува на тој начин превидува дека стареењето со себе носи и позитивни работи“, вели Денкингер, директор на една геријатриска клиника и раководител на Институтот за геријатриски истражувања при Универзитетската клиника во Улм.
Критиката на професорот се однесува на трендот познат како „longevity“, односно долговечност, стремеж кон особено долг и здрав живот. За разлика од „anti-aging“, кој пред сè се занимава со изгледот, „longevity“ настојува биолошки да го забави стареењето.
Инфлуенсерите и индустријата го препознаа овој тренд и промовираат стратегии и производи кои наводно треба да помогнат во тоа.
Пример се одредени пептиди за кои се тврди дека го подмладуваат ткивото.
„За сето тоа нема докази, најмногу што постои се сознанија од испитувања врз животни“, вели Денкингер.
„Не постои производ за кој е докажано дека го продолжува животот на луѓето“, додаде тој.
Сепак, нема ништо спорно во целта да се живее долго и здраво да се старее, вели Денкингер. Познато е и што помага, а тоа се многу движење, добра исхрана, непушење, малку алкохол, превентивни прегледи и одржување на социјалните контакти.
Од 23 до 26 септември во Франкфурт ќе се соберат околу 1.000 геријатри и геронтолози на конференција посветена на актуелните прашања поврзани со староста и стареењето.
Ќе се разговара за новите терапии за Алцхајмеровата болест, влијанието на климатските промени врз постарите лица, новите технологии во негата и концептите за самостоен живот.
На програмата е и темата „Дали стареењето е болест?“.
