Администрацијата на претседателот на САД, Доналд Трамп, ја заврши првата продажба на венецуелска нафта во вредност од 500 милиони долари, потврди во средата еден службеник на администрацијата.
Службеникот исто така изјавил дека се очекуваат дополнителни продажби во наредните денови и недели.
Договорот прв го објави „Semafor“, вклучувајќи ја и информацијата дека приходите од продажбата се чуваат на банкарски сметки, меѓу кои и една во Катар, кои се под контрола на американската влада.
„Претседателот Трамп посредуваше во историски енергетски договор со Венецуела, веднаш по апсењето на нарко-терористот Николас Мадуро, кој ќе им користи на американскиот и венецуелскиот народ“, изјави портпаролката на Белата куќа, Тејлор Роџерс.
Таа наведе и дека продолжуваат разговорите со нафтените компании од САД.
„Тимот на Трамп олеснува позитивни, тековни разговори со нафтени компании кои се подготвени и волни да извршат без преседан инвестиции во обновата на венецуелската нафтена инфраструктура. Претседателот Трамп ја штити нашата Западна хемисфера од искористување од страна на нарко-терористи, шверцери на дрога и странски противници“, продолжи таа.
Овој нафтен договор е првата продажба откако САД го соборија Мадуро, поранешниот претседател на Венецуела, претходно овој месец.
Трамп брзо навести дека американските нафтени компании ќе бидат вклучени во експлоатацијата на богатите венецуелски резерви на нафта по апсењето на Мадуро. Тој минатата недела ги угости челниците на бројни американски нафтени компании во Белата куќа.
