За оние што планираат патување во февруари, достапни се и понуди веќе од 44 фунти за повратен лет.

Лион, сместен на југоистокот од Франција во живописниот регион „Auvergne-Rhône-Alpes“, често останува занемарен како дестинација за краток градски одмор. Сепак, станува збор за вистински рај за љубителите на храна и град кој неофицијално е наречен „светска престолнина на гастрономијата“, пред сè затоа што има повеќе ресторани по глава на жител отколку кој било друг град во Франција. Во Лион има низа култни ресторани, меѓу кои и 18 со една или повеќе „Мишелин“ ѕвезди.

„Папа на гастрономијата“

Во срцето на гастрономската култура на Лион се наоѓаат „bouchons“ – пријатни и најчесто пристапни ресторани што служат обилни јадења од традиционалната лионска кујна, како колбаси, „coq au vin“ и паштета од патка. Се карактеризираат со топла и опуштена атмосфера, традиционален ентериер и ненаметлива услуга, а многумина нудат и фиксни менија по однапред одредена цена.

За љубителите на „фајн-дајнинг“, во градот има неколку ресторани со две Мишелин ѕвезди, меѓу кои можеби најпознат е „Restaurant Paul Bocuse“. Наречен по славниот шеф, кој го носел прекарот „папа на гастрономијата“, овој шарен ресторан се наоѓа покрај брегот на реката Сона (Saône), северно од центарот на Лион. Внатрешноста е класична, со бели чаршафи на масите и лустери, додека кујната повремено „излегува“ во трпезаријата, нудејќи им на гостите жив приказ на подготовката на модерната француска кујна.

„Le Neuvième Art“ е уште еден елегантен ресторан со две Мишелин ѕвезди. Специјализиран за висока кујна, овој светол и модерен простор нуди естетски дотерани јадења, со акцент на зелената палета на бои, пренесе „Express“.

Но Лион не е привлечен само поради својата гастрономија. Станува збор за град идеален за прошетки, со богата историја што се протега од римските урнатини до средновековните улици. Квартот Vieux Lyon (Стариот Лион) се наоѓа на листата на светско наследство на УНЕСКО благодарение на импресивната ренесансна архитектура, калдрмисаните улици и скриените дворови. Особено внимание привлекуваат „traboules“ – скриени покриени премини кои првично им служеле на свиларите, а подоцна ги користел и францускиот отпор за време на Втората светска војна.

Од инсекти до коски од диносауруси

Една од највпечатливите градби во градот е базиликата Нотр-Дам де Фурвјер (Notre-Dame de Fourvière). Според лионските мерила, таа е релативно нова – изградена е кон крајот на 19. век, а инспирирана е од византискиот, готскиот и романичкиот стил.

Богато украсената надворешност од делкан камен и раскошната внатрешност со насликани тавани и витражи ја прават еден од најфотографираните симболи на градот.

Значително помодерен изглед има „Musée des Confluences“, музеј на наука и антропологија отворен во 2014 година. Градбата од челик и стакло, чиј облик е замислен како „кристален облак“, нуди богат избор експонати – од инсекти до коски од диносауруси – како и бројни интерактивни содржини што ја поттикнуваат детската фантазија.