Тие се обвинети за измама и кражба тешка повеќе од 30.000 евра, пренесе „Вашингтон пост“.

„Ова ќе го има сè повеќе“

„Ова не им беше првпат“, изјавил обвинителот на округот Кларк, Метју Бас, чија канцеларија ја води истражната постапка.

Тој додал дека има „бројни активни истраги за кражби на скапоцени вина низ целата земја, во кои Реј и Крндија се потенцијални осомничени“.

Експерти од винската индустрија оцениле дека кражбата во Вирџинија има карактеристики на „растечки тренд“ што се бележи ширум САД и Европа.

„Ова ќе го има сè повеќе, а не помалку“, рекла Морин Дауни, специјалистка за измами со вино, која управува со колекции со висока вредност за компании и приватни клиенти.

Како причини ги навела црниот пазар, потоа ресторани и продавници што јавно ги промовираат винските карти на интернет, а истовремено недоволно вложуваат во безбедност, како и фактот дека шишињата лесно можат да се пренесуваат.

„Вредноста на вината од врвни лозја толку многу порасна што директно поттикнува вакви кражби“, истакнал Мајкл Иган, експерт за автентикација на вински колекции.

Обиколка на винскиот подрум

Според наводите на полицијата, доцна попладне на 19 ноември, осомничените Никола Крндија, државјанин на Србија и Натали Реј, по потекло од англискиот Кент, му пристапиле на вработен во ресторанот „L’Auberge Provencale“, а средбата ја забележале надзорните камери.

Жената се претставила како лична асистентка на директорот на една канадска компанија, наведувајќи дека сака да организира вечера.

„Слушнав за вашата репутација. Ме испратија однапред да проверам сè“, рекла таа.

Нејзиниот придружник, маж со проседена коса, носел долг капут и ракавици.

„Дали е можно да ми го покажете винскиот подрум?“, го прашала таа вработениот.

Така Кристијан Борел го однел парот во подрумот. Додека траела обиколката, проседиот маж се оддалечил низ ходникот во кој се наоѓале највредните шишиња. Вработениот тогаш се посомневал, но реагирал дури откако сите се вратиле на катот.

Тогаш извикал: „Запрете ги! Крадат вина“.

Жената била брзо уапсена

Според наводите на полицијата, мажот потоа истрчал надвор, стигнал до изнајменото возило и побегнал. Жената ја запреле келнерите, по што набргу пристигнала полицијата и ја уапсила.

Против Натали Реј се подигнати три обвиненија, а ќе се појави пред суд на 11 февруари.

Се наведува дека на истражителите им било потребно извесно време да го идентификуваат проседиот маж.

Шерифот на округот Кларк, Трејвис Самптон, соопштил дека Крндија по кражбата се упатил кон север и веќе наредниот ден полетал со авион од Њујорк за Виена, а властите сè уште се обидуваат да го утврдат неговото моментално престојувалиште.

Веднаш бил известен и Интерпол

Канцеларијата на шерифот објавила фотографија од Крндија, потврдувајќи им на вработените во ресторанот дека бил маскиран.

„Само додајте му мала брада и перика, и тоа е тој“, рекол работникот Кристијан Борел.

Истражителите потврдиле дека за случајот е известен и Интерпол, меѓународната полициска организација која помага во лоцирање бегалци.