Американскиот Сенат го одобри именувањето на милијардерот и инвеститор Џаред Ајзакман (42) за директор на НАСА, со што беше ставен крај на необичниот процес на номинација во кој Доналд Трамп прво го предложи, па повлече, па потоа повторно го номинираше за таа позиција.
Ајзакман, аматерски пилот на млазен авион кој стана првиот непрофесионален астронаут што извел вселенска прошетка, е првиот администратор на НАСА во последните неколку децении што доаѓа директно однадвор, односно надвор од владините структури.
За многумина, неговиот мандат на чело на агенцијата ќе биде проценет преку еден клучен тест – дали агенцијата ќе успее да ги врати луѓето на Месечината пред Кина.
Трамп јасно стави до знаење дека сака САД да воспостават постојана лунарна база, која би овозможила експлоатација на ресурси и би служела како отскочна штица за идните мисии кон Марс.
Трамп првпат ја објави својата намера да го номинира Ајзакман во декември 2024 година, но ја повлече номинацијата во мај, во екот на јавниот судир со Илон Маск, сојузник на Ајзакман.
Маск, еден од најголемите политички донатори на Трамп и главен извршен директор на „SpaceX“, редовно беше присутен во Овалната соба заедно со Трамп, но двајцата жестоко се судрија околу прашањата за владината потрошувачка.
Во рок од неколку дена, Трамп ја повлече номинацијата на Ајзакман, повикувајќи се на „темелна ревизија на претходните врски“.
Во ноември, тој повторно ја поддржа номинацијата на Ајзакман.
За време на сослушувањето за потврда на кандидатурата, одржано претходно овој месец, Ајзакман изјави дека ја поддржува мисијата на Трамп за рударење на Месечината.
Милијардерот смета дека воведувањето поголема конкуренција од приватниот сектор е клучно за успех во новата вселенска трка.
Неговата отвореност кон комерцијалната конкуренција би можела да создаде конфликт со Маск. Минатата недела, Ајзакман ја пофали одлуката за доделување голем договор на компанијата „Blue Origin“, во сопственост на Џеф Безос од „Amazon“ и ривал на „SpaceX“.
Тој, исто така, предложи НАСА да соработува поинтензивно со универзитетите и академските институции, позиционирајќи ја агенцијата како „мултипликатор на моќ за науката“.
Според „Forbes“, нето-богатството на Ајзакман се проценува на 1,2 милијарди долари, главно стекнати преку неговата компанија за обработка на плаќања и преку продажбата на фирма која обучувала пилоти и управувала со приватна флота од воени авиони.
Тој ќе го наследи Шон Дафи, кој од јули ја извршуваше функцијата вршител на должноста директор на НАСА.
