Предновогодишната и празнична магија со себе носи и солидарност, сѐ повеќе хуманитарни акции се случуваат низ Македонија, а еден убав пример пристигнува и од Гевгелија.
Акциите кои се организираат за помош на социјално загрозените категории носат нова радост и ја враќаат вербата во луѓето.
Една локална пилјара во Гевгелија која се вика „Кај кецот“ покажа дека хуманоста не бара големи ресурси туку доволна е само искрена желба да им се помогне на оние на кои им е најпотребно.
Тие пред нивната пилјара поставиле пано со закачалки каде граѓаните можат да остават топла зимска облека, како и прехранбени продукти со што на поединци би им обезбедиле топол оброк во текот на денот. Акцијата е отворена за сите.
Хуманитарна акција , закачалка на добрината под мотото „Кој има две блузи, нека даде една на оној што нема ниедна; и кој...
Posted by Piljara ''Кај Кецот'' on Tuesday, December 16, 2025
„Хуманитарна акција – закачалка на добрината под мотото: Кој има две блузи нека даде една на оној којшто нема ниедна и кој има храна нека постапи исто така“, пишува покрај поставеното пано.
„Апелираме сите оние кои немаат и навистина им е потребно, да се послужат од истата. Да ги направиме празниците убави за сите“, порачаа од локалната пилјара.
Оваа хуманитарна иницијатива наиде на голем одѕив и позитивни коментари на социјалните мрежи, па така се нижат коментари, како:
„Браво деца, само така“, „Големо хумано срце. Браво, нека продолжи за пример“, „Браво за идејата“...
