Британската уметница и сценографка Ес Девлин, позната по впечатливите просторни инсталации кои ги бришат границите меѓу уметноста, архитектурата и перформансот, ја претстави својата најнова работа – „Library of Us“, шест метри висока триаголна ротирачка полица за книги што се издига од надреален воден базен.
Инсталацијата, поставена на крајбрежјето во рамките на „Faena District“, го претвора просторот во интимен, блескав амфитеатар посветен на книгите, звукот и споделеното читање, пишува „Њујорк тајмс“.
Делото е централна атракција на одбележувањето на десетгодишнината на „Faena Ar“t, културна платформа која во последната деценија стана една од најзначајните сили на современата уметничка сцена во Мајами. Иако „Faena“ е позната по своите спектакуларни проекти на границата меѓу реалност и фикција, новата инсталација на Девлин ја подигнува летвичката, создавајќи простор во кој посетителите не се само набљудувачи, туку активни учесници – дел од „библиотеката“ што расте со секој нивни чекор, поглед или разговор.
„Library of Us“ е составена од монументална триаголна структура обложена со полички, чиј одраз во темниот, мирен базен создава илузија на бескраен простор – како врата кон паралелна библиотека исполнета со тивка светлина што лебди меѓу небото и водата. Инсталацијата се врти полека, како светилник кој наместо светлина испушта – приказни. Девлин, позната по користењето светлина како уметнички материјал, тука создава меко пулсирачко сјаење што ноќното крајбрежје го претвора во современ храм на читањето.
Она што ова дело го прави особено привлечно е неговата двојна функција. Покрај тоа што е силен уметнички исказ, инсталацијата служи и како јавна библиотека и место за собирање. Посетителите можат да седнат покрај водата, да земаат и враќаат книги, да влезат во тивки разговори, да слушаат внимателно програмирани звучни пејзажи или едноставно да ја гледаат како ротира – механичка медитација во движење.
„Library of Us“ не е само објект – туку искуство. Таа потсетува дека читањето, иако често тешко вклопливо во брзиот ритам на секојдневието, е всушност заеднички чин, дури и кога го доживуваме сами. Книгите во инсталацијата стануваат точки на поврзување меѓу луѓе кои можеби никогаш нема да се сретнат, а просторот што го создаде Девлин нуди привремено засолниште од бучавата на модерниот живот.
