Автопортрет од познатата мексиканска уметница Фрида Кало е продаден за 54,7 милиони долари во Њујорк, поставувајќи рекорд за највредно дело од уметница некогаш продадено на аукција, соопшти „Сотбис“ , пренесуваат странските медиуми.
Аукциската куќа соопшти дека двајца понудувачи се натпреварувале во петминутна војна на лицитирање за сликата од 1940 година „El sueño (La cama)“, што во превод значи „Сонот (Креветот)“ и ја прикажува Кало како лежи во кревет. Идентитетот на победникот на аукцијата не е откриен.
Претходниот рекорд за продадено дело од уметница на аукција го држеше американската сликарка Џорџија О’Киф, чија слика „Џимсон Вид/Бел цвет бр. 1“ беше продадена за 44 милиони долари во 2014 година. Рекордот за продадено дело од Фрида Кало беше 34,9 милиони долари, поставен во 2021 година.
„Сонот (Креветот)“ последен пат беше продадена на аукција во 1980 година за 51.000 долари – околу илјадити дел од нејзината сегашна цена. Ана ди Стаси, раководител на одделот за латиноамериканска уметност во „Сотбис“, изјави дека продажбата го одразува и растечкото ценење на генијалноста на Кало и растечкото признавање на женските уметници на пазарот на луксузни стоки.
Светски познатата уметница е родена во 1907 година и починала во 1954 година на само 47-годишна возраст по живот обележан со физичка и емоционална болка. Таа беше најпозната по своите автопортрети.
