Повеќе од еден век подоцна, овој алкохолен пијалак и понатаму е длабоко вкоренет во британската култура, пишува „Дејли мејл“.

Потеклото на пијалакот датира од деветнаесеттиот век во Индија, каде што тоник водата богата со кинин, екстрахиран од кората на дрвото кинхона, била нашироко користена од Британската кралска морнарица. Кининот долго време се сметал за супстанција што спречува маларија, но бидејќи оригиналната тоник вода била многу горчлива, морнарите тешко ја консумирале. Во типичен британски стил, адмиралите предложиле да се направи попријатна за пиење со мешање шеќер, лимета, вода и џин и така се родил пијалакот што го познаваме денес.

Иако Черчил можеби ги преценил придобивките од тоник водата богата со кинин и ботаничкиот алкохол, експертите се согласуваат дека џин-тоникот навистина може да биде најдобриот избор за луѓето што ќе пијат на забава, поради неговите „скриени“ здравствени предности.

Нутриционистите велат дека нискокалоричните пијалаци се најдобра опција ако некој веќе одлучил да консумира алкохол.

„Нема сомнеж дека секој пијалак има негативно долгорочно влијание врз здравјето“, вели Ручи Буванија Лохија, регистриран нутриционист за долговечност.

„Но, кога гледам клиенти во ординација, ја гледам реалноста. За многумина, целосното исфрлање на алкохолот не е реално, бидејќи чувствуваат дека ќе пропуштат социјални моменти, па неколку мали и реални промени во навиките можат да помогнат“.

Џин-тоникот и неговите наводни придобивки

Нутриционистката објаснува дека замената на пијалаци богати со калории и шеќер со чисти алкохоли како џинот може да биде поблага за дигестијата и половината.

„Станува збор за разумни избори. Ако заменувате пет кригли пиво со џин-тоник, тоа е подобра одлука, бидејќи има помалку калории и не предизвикува надуеност“, вели Лохија.

„Но, пиењето кој било алкохолен пијалак наместо безалкохолен не е добар избор“.

Еден шот џин има околу 50 калории, во споредба со околу 130 калории во средна чаша црвено или бело вино или 200–300 калории во чаша пиво.

„Чистите алкохоли полесно се метаболизираат и создаваат помал стрес на телото“, додава регистрираниот нутриционист Џи-Кју Џордан.

„Дополнителна предност на џин-тоникот е што ботаничките состојки му даваат горчлив вкус кој го забавува темпото на пиење“.

Порција од 200 милилитри лесен тоник има околу 30 калории, што го држи еден џин-тоник под 100 калории по чаша.

„Многу е важно кој миксер ќе го изберете“, вели Лохија.

Проблемот со миксерите богати со шеќер

„Ако користите кока-кола, внесувате многу шеќер, што е исто како да пиете порт“, објаснува таа.

Џи-Кју Џордан додава: „Полните шеќерни миксери исто така влијаат на рамнотежата на шеќерот во крвта, што потоа води до желби за храна, како доцноноќниот кебап, што значи уште повеќе калории“.

Просечниот Британец пие 17,6 единици алкохол неделно, според податоците на Националниот здравствен систем, што е еквивалентно на осум до девет пива.

Пиењето иста количина џин-тоници, иако не се препорачува возрасен да консумира повеќе од 14 единици неделно, би значело намалување на околу 900 празни калории месечно и губење на околу 6 килограми за една година.

А што е со кининот?

И покрај старите верувања, експертите предупредуваат дека денешните тоник води содржат многу помалку кинин отколку порано.

Во Велика Британија, тоникот „Фивер Три“ содржи највисока количина кинин — околу 0,39 милиграми на милилитар, додека просекот е околу 0,34. Терапевтската доза за заштита од маларија е 14 грама на килограм на секои осум часа. Тоа значи дека некој би морал да испие 14 џин-тоници на секои осум часа, што е тотално нереално и опасно. Голем внес на кинин може да предизвика нарушувања на срцевиот ритам, низок шеќер во крвта и алергиски реакции.

Митови за антиоксиданси

Популарен мит е дека џинот е богат со антиоксиданси поради смреките што се користат во производството.

Иако смреката содржи витамин Ц, флавоноиди и антиоксиданси што може да помогнат при циркулација, настинки и воспаленија — експертите велат дека модерниот џин нема доволно смреки за да даде вистински здравствени придобивки.

„Нема здравствена корист од антиоксидансите во џинот или од кининот во тоникот“, вели Џи-Кју Џордан.

Тој додава дека единственото разумно правило е умереност и информиран избор. Но, и секогаш да се пие вода меѓу пијалаците.