Пратеничката Моника Трајанова од Пратеничката група на ВМРО-ДПМНЕ изјави дека предлог-буџетот за наредната година предвидува значајни инвестиции во здравството, со цел подобрување на здравјето и благосостојбата на граѓаните.
Трајанова посочи дека се планирани повеќе од 112 милиони денари за изградба на нов клинички центар во Скопје и во Штип, како и 15 милиони денари за болницата во Кичево. Дополнително, предвидени се скоро 370 милиони денари за генерална реконструкција и доградба на јавните здравствени установи низ Македонија.
Пратеничката наведе дека паралелно продолжува систематското финансирање на јавните здравствени установи и голем број целни програми, меѓу кои: 1,08 милијарди денари за лекување на ретки болести, 860 милиони денари за обезбедување инсулин за пациентите, зголемување на превентивните програми за туберкулоза за 2,5 милиони денари, зголемување на програмата за крводарителство за 2 милиони денари.
„Посветеноста на Владата кон здравјето на секој еден е јасна и недвосмислена. Идната, 2026-та, граѓаните добиваат повеќе, а системот станува одржлив“, истакна Трајанова.
Таа додаде дека буџетот обезбедува континуитет на најважните здравствени програми, подобри услови за здравствените работници и поддршка за најранливите преку зголемени средства во клучните програми.
