Џаред Кушнер во 2013 година го поканил осудениот милијардер педофил Џефри Епштајн на забава на која присуствувале таткото на неговата сопруга, Доналд Трамп и продуцентот Харви Вајнштајн, кој во тоа време сè уште не беше осуден силувач.
Хрониката на документи што минатата недела ги објави Одборот за надзор на Претставничкиот дом вклучува и мејл до Епштајн, кој во тоа време веќе ја отслужил 13-месечната затворска казна поради сексуални злосторства врз деца, пренесува „Daily Mail“.
Откритието се појавува додека новинарите прегледуваат илјадници страници документи, а Конгресот на САД се подготвува за гласање за објавување на сите досиеја на Епштајн, со необична поддршка од претседателот Трамп, кој одеднаш го промени својот став.
Трамп, кој некогаш бил пријател со Епштајн, тврди дека му забранил влез во Мар-а-Лаго во октомври 2007 година бидејќи бил „морничав“. На новинарите во текот на летото, во „Air Force One“, им рече дека „Џефри Епштајн и тој имале многу лош однос долги години“.
Кушнер тогаш бил сопственик на неделникот „New York Observer“ кога Епштајн преку мејл ја добил поканата за прославата на 25-годишнината на весникот на 14 март 2013 година. Не е познато дали финансискиот магнат присуствувал на настанот.
„Градоначалникот Мајкл Блумберг ќе биде со него за да ви наздрави на сите“, стоело во пораката која до Епштајн ја проследила асистентката на Кушнер, Лорен Гроф.
На списокот на гости се нашле неговата сопруга Иванка и нејзиниот татко Доналд Трамп, како и тогашниот градоначалник на Њуарк, Кори Букер, кој во тоа време беше кандидат за американскиот Сенат, актерките Блејк Лајвли и Кејти Холмс, модната дизајнерка Каролина Херера и тогашната сопруга на Харви Вајнштајн, модната дизајнерка Џорџина Чепмен.
Епштајн во 2008 година беше осуден на Флорида по обвиненија за доведување малолетници во проституција и барање проституција, и отслужи 13 месеци во програмата за работа надвор од затвор како дел од контроверзниот спогодбен договор.
Списокот на поканети лица на Кушнер вклучувал и веќе осудени, како и наскоро осудени сексуални престапници. Обвиненијата за силување против Вајнштајн се појавија во 2017 година, а тој во моментов ја издржува 16-годишната затворска казна поради силување.
И поранешниот главен уредник на „New York Observer“, Кен Курсон, бил на списокот на гости. Трамп го помилува во 2021 година откако беше обвинет за сајбер прогонување. Во мејлот од март 2013 година се наведува дека забавата ќе им оддаде чест на „најдобрите“ и „најсјајните“ во Њујорк.
„‘Observer’ им оддава чест на оние кои го дефинирале и обликувале Њујорк од 1987 година“, се наведува во мејлот и продолжува:
„Тие го слават најдоброто, најсјајното и највлијателното во културата, медиумите и финансиите. Прославата ќе биде една од оние типични њујоршки ноќи. Со нетрпение очекуваме да ве видиме“.
Кушнер како издавач и Џозеф Мејер како извршен директор биле домаќини на забавата на „Observer“.
Неделникот, кој целосно премина во дигитална форма во 2016 година, Кушнер го купи во 2006 година и го продаде својот сопственички удел во 2017 година, кога ја прифати својата улога во администрацијата на Трамп. Публикацијата беше продадена на „семеен фонд“.
