Чилеанската манекенка и пејачка, која ја претставува својата земја на изборот за „Miss Universe 2025“, стана вирална учествувајќи во популарниот тренд „Addicted to You“, но не на начинот на кој очекуваше.

Во спорното видео, кое подоцна беше избришано од нејзиниот официјален профил, Ина се снимала како вдишува бела пудра во прав, по што следи гламурозна „трансформација“. Подоцна објасни дека станува збор за безопасна шега осмислена заедно со тимот шминкери.

Меѓутоа, многумина го поврзаа видеото со дрога и го прогласија за целосно несоодветно за една натпреварувачка на „Miss Universe“, а дел од јавноста дури повика и на нејзина дисквалификација.

Интернетот немал разбирање

Иако за нив тоа била интерна шега, публиката на социјалните мрежи не покажа многу разбирање. Видеото за само неколку часа се прошири низ социјалните мрежи и специјализирани страници посветени на избори за убавина, поттикнувајќи жестока расправа.

Многумина нејзиниот потег го нарекоа „несоодветен“ и „неодговорен“, објаснувајќи дека таквата содржина го руши имиџот на сериозност, софистицираност и одговорност што се очекува од една „Miss Universe“.

Други пак застанаа во нејзина одбрана, убедени дека ситуацијата се драматизира непотребно. „Само се шегувала“, напиша еден обожавател. „Луѓето навистина треба малку да се опуштат“.

Сепак, критиките се побројни. „Разбирам дека тоа е тренд, но вие ја претставувате својата земја“, напиша еден корисник. „Ова едноставно не е момент за такви нешта“.

Одговорот на Ина: „Требаше да кажам не“

Под растечкиот притисок, Ина Мол се огласи преку Инстаграм стори за да објасни што всушност се случило и да им се извини на сите кои видеото можеби ги навредило или налутило.

„Сакам да се извинам на сите кои се почувствуваа навредено“, порача таа. „Шминкерот ми предложи да го снимиме тоа, а можеби поради јазичната бариера не сфатив целосно што се подготвува. Прво реков не, но тој инсистираше и на крајот прифатив. Требаше цврсто да останам при тоа ‘не’“.

Нејзината искреност кај дел од следбениците наиде на разбирање и поддршка, но многумина сè уште се прашуваа како воопшто можела да помине таква идеја, особено во официјален контекст на избор за убавина.

Шминкерот ја презеде вината

Ден по изјавата на Ина, на јавноста ѝ се обрати и шминкерот кој стои зад видеото. И тој на Инстаграм објави извинување.

„До Мис Чиле и сите кои ја сакаат Мис Чиле, искрено ми е жал за тоа што се случи“, напиша тој. „Она што го направив беше непромислено и без никаква скриена намера да ѝ наштетам на кандидатката или на имиџот на земјата. Тоа беше само дел од содржина која го следи актуелниот онлајн тренд. Ве уверувам дека нешто слично нема повторно да се случи“.

Неговото извинување предизвика нови поделени реакции – едни го пофалија што ја презеде одговорноста, други оценија дека „штетата веќе е направена“.