Американскиот носач на авиони „USS Gerald R. Ford“ вчера вплови во сплитскиот акваториум, каде пристигна во рамки на билатератна воена соработка со силите на САД, пренесува Dnevnik.hr.

Со своите 333 метри должина, 76 метри ширина и простор за 75 летала, овој џин е најголемиот воен брод во историјата што некогаш пристигнал во Хрватска. Покрај тоа, „USS Gerald R. Ford“ (CVN 78) е најголемиот воен брод некогаш изграден и претставува најнапредниот и најмоќниот брод во светот. Името го носи по 38-от американски претседател Џералд Рудолф Форд, кој служел во американската морнарица за време на Втората светска војна, токму на носач на авиони.

Изградбата на бродот чинела 12,8 милијарди долари, а дополнителни 4,7 милијарди биле инвестирани во истражување и развој. Неговата максимална брзина надминува 30 јазли (околу 55 км/ч).

Поминал на тестот

Во летото 2021 година, американската морнарица направи нешто незамисливо: ја нападна сопствената воена платформа. Го усидрија сосема новиот носач на авиони „USS Gerald R. Ford“ на источниот брег на САД и го подложи на серија подводни експлозии. Тестирањата покажаа дека „Ford“ може да го заштити својот екипаж од пет илјади морнари – повеќе од вкупниот број загинати американски војници при нападот на Пёрл Харбор.

За време на шок-тестовите, бродот претрпел само мали оштетувања, покажувајќи дека може да преживее дури и речиси директен удар од моќен проектил како кинескиот „DF-21“.

„Ford“ е полн со технолошки иновации кои ја зголемуваат ефикасноста и овозможуваат идни надградби. Најзначајната новина е електромагнетниот систем за лансирање на летала – „EMALS“, кој со помош на силни магнетни полиња го забрзува леталото по палубата и го лансира во воздух. Благодарение на овој систем, кој го замени стариот катапулт, „Ford“ може да изведе повеќе летови, што вклучува и зголемен број беспилотни летала.

Тука се и новите радарски системи, како и нови лифтови за оружје, кои побрзо ги пренесуваат ракетите и бомбите од магацините до палубата.

„Најсмртоносната борбена платформа на светот“

Вистинската моќ на носачот, сепак, лежи во неговите напредни летала – „летачки радари“, хеликоптери за противподморнички и логистички мисии, како и „тилт-ротор“ летала наменети за транспорт на луѓе, опрема и пошта.

„CVN 78“ не мирува. Само шест месеци по учеството во НАТО вежбите во Норвешка, „Gerald R. Ford“ беше пренасочен во источниот Медитеран по нападите на Хамас врз Израел. Во јануари 2024 година, носачот и неговиот екипаж се вратија во својата матична база – поморската база „Норфолк“.

Со својата големина, моќ, екипаж и воздушни сили, „Ford“ е способен да изведува напади на тешко достапни цели, да одбива закани од море, воздух и подморје, но и да пружа помош на цивили во случај на природни катастрофи. Токму тоа го прави едно од најмултифункционалните оружја на денешницата.

Затоа не е ни чудно што многумина го нарекуваат – „најсмртоносната борбена платформа на светот“.