Во естонскиот град Нарва, кој се наоѓа веднаш на самата граница со Русија, започна со работа и производство првата комерцијална фабрика за реткоземни магнети во Европа.
На неодамнешното отворање на фабриката, премиерот на Естонија, Кристен Михал, изјави дека оваа фабрика претставува иднината на европската конкурентност.
Првата фаза од новата фабрика, во сопственост на компанијата „Neo Performance Materials“, ќе може годишно да произведува магнети за еден милион електрични возила и за 1.000 генератори за индустријата за енергија од ветер. Овие магнети ги прават електричните системи поефикасни, а побарувачката за нив брзо расте.
Претседателката на Европската комисија, Урсула фон дер Лајен, дури и понесе магнет произведен во Нарва на самитот на Г7 во Канада во јуни, каде што му го предаде на премиерот Марк Карни.
Бидејќи магнетите се произведуваат од реткоземни елементи — метали со чија екстракција и преработка доминира Кина — досега немаше комерцијално производство во Европа сè додека „Neo“ не го насочи своето внимание кон овој град на руската граница.
Фабриката на „Neo“ — која е само прва фаза од потенцијално многу поголем проект во Нарва — ќе поддржи 300 работни места, со можност тој број да порасне на околу 1000. Неодимиумот, реткоземен елемент кој се користи во перманентни магнети, ќе се набавува од Австралија.
Сепак, и покрај добрите вести, Естонците стравуваат дека работите би можеле да тргнат наопаку.
Нарва и нејзината околина, со своето големо население кое зборува руски, би можеле да бидат следна цел на Москва по Крим, Донбас и остатокот од Украина. Доколку рускиот претседател Владимир Путин им нареди на своите трупи да влезат во Естонија, градот би бил една од нивните први цели.
„Ова е земја-членка на НАТО. Убедени сме дека Алијансата би реагирала и се надеваме дека постоечката војна ќе заврши што е можно поскоро. Внимателно ја проценивме локацијата“, изјави извршниот директор на компанијата, Рахим Сулеман.
