Во понудата на онлајн трговската платформа „Temu“ се појавија и плочи за надгробни споменици, што предизвика поделени реакции меѓу потрошувачите.
Познато е дека на „Temu“ може да се најде речиси сè – од предмети за секојдневна употреба, па сè до оние за кои никој не би помислил дека постојат, сè додека не ги види во непрекинатите и агресивни реклами што компанијата ги пласира секој ден.
По бројните измами што корисниците секојдневно ги пријавуваат, како нова контроверзна понуда се појавија надгробни плочи, рамки за фотографии, како и предмети со испишани емотивни пораки посветени на починати блиски лица.
Оваа понуда, според многумина, се граничи со бизарност, а мислењата на корисниците се остро поделени.
Некои корисници на „Temu“ сметаат дека компанијата избрала непристоен начин за заработка, додека други тврдат дека цените се исклучително пристапни и дека оваа услуга би можела да им користи на луѓе кои бараат поекономично решение.
Коментарите и оцените на овие производи укажуваат на едно – постојат луѓе кои навистина направиле сериозна нарачка и преку „Temu“ купиле надгробни плочи и фотографии посветени на своите починати најблиски.
