Новиот систем на подземна железница во Ријад, главниот град на Саудиска Арабија, не е само јавен превоз, туку искуство кое многумина го споредуваат со најпознатите туристички атракции. Најголемиот метро систем без возач во светот се отвори кон крајот на минатата година и до денес го користеле повеќе од 100 милиони луѓе, како локални жители така и туристи.

Метро систем вреден неверојатни 22,5 милијарди долари

Метрото вредно 22,5 милијарди долари, се отвори во декември 2024 година, а веќе е наречено „најбрилијантниот и најфутуристички транспортен систем во светот“. Си-ен-ен пишува дека се работи за најголемиот метро систем без возач во светот, долг 176 километри, со дури шест линии што ги поврзуваат клучните точки на градот, од меѓународниот аеродром до финансискиот округ Крал Абдула.

Капацитетот на метрото е 3,6 милиони патници дневно

Си-ен-ен пишува дека метрото може да превезува најмалку 3,6 милиони патници дневно. Во првите 11 недели биле регистрирани повеќе од 18 милиони патници, а во август оваа година беше пречекан 100-милионитиот корисник.

Возовите се поделени во три класи: посебни вагони за самци-мажи, семејни вагони и прва класа. Внатрешноста е дизајнирана од француската компанија „Avant Premiere“, а мотивите на седиштата се инспирирани од традиционалната архитектура на Ријад. Храна и пијалаци не се дозволени, што обезбедува беспрекорна чистота.

Двочасовен билет чини четири ријали (нешто повеќе од еден долар), додека неограничено патување за еден месец може да се добие за 140 ријали, или 37 долари. Метрото работи од 5:30 часот наутро до полноќ, освен во петок кога работи од 10 часот наутро.

Метро станици како архитектонски чуда

Од 85-те станици, четири се издвојуваат како архитектонски чуда: Финансискиот округ Крал Абдула (KAFD), „STC“, „Western“ и „Qasr Al Hokm“. Втората, сместена во историскиот центар, беше отворена во февруари 2025 година и веќе стана атракција. Делото на норвешкото студио „Snøhetta“ се протега на 22.500 квадратни метри и е длабоко 40 метри. Има седум ката, 17 лифтови и 46 ескалатори, а нејзиниот закривен челичен покрив ги одразува историските згради во близина. Внатре, патниците можат да застанат во градината, да разгледаат уметнички дела или да ги посетат продавниците.

Изгледот на главната станица го потпишува студиото на Заха Хадид

„Zaha Hadid Architects“ го потпишува дизајнот на главната станица „KAFD“, со фасада што потсетува на пустински дини во облик на ветер. Таа е исто така и најпрометната, поврзувајќи три метро линии, монорел и автобуски терминал.

Исто така, во неа се наоѓа скулптура на Александар Калдер од постојаната колекција на „Ријад Арт“. Германското студио „Gerber Architekten“ се инспирирало од варовнички формации за станицата „STC“, додека Западната станица (Western Station) е дело на саудиската компанија „Омраниа“.

Системот се покажа како исклучително популарен. Амбициозни планови веќе се во тек. Се очекува нова седма линија што треба да ги поврзе забавниот град Кидија, ботаничкиот комплекс Градини на кралот Абдула и историската „Diriyah Gate“, пренесе Си-ен-ен.