Легендарниот актер и режисер Роберт Редфорд почина на 89-годишна возраст. Освен што остави неизбришлива трага во филмската индустрија, зад себе остави и огромно богатство, а неговиот имот се проценува на околу 200 милиони американски долари.
Неговата кариера траеше повеќе од шест децении. Се прослави во филмови како „Butch Cassidy and the Sundance Kid“, „The Sting“, „All the President’s Men“ и „Out of Africa“. Оскар за најдобра режија освои во 1981 година за филмот „Ordinary People“, а значајна улога во независната кинематографија имаше како основач на „Sundance Institute“ и „Sundance Film Festival“.
Иако неговите актерски и режисерски приходи беа високи, важна улога во неговиот финансиски успех имаа и деловните активности поврзани со проектот „Sundance“.
Во текот на кариерата долга повеќе од 50 години, Редфорд заработи стотици милиони долари благодарение на актерството, режијата, продукцијата и бројните деловни потфати. Според јавно достапни податоци, неговата вкупна нето вредност се проценува на околу 200 милиони долари.
Некои од позначајните хонорари вклучуваат околу 500.000 долари за филмот „The Sting“ (1973), приближно 2 милиони за „A Bridge Too Far“ (1977), 3,5 милиони за „The Electric Horseman“ (1979), 4 милиони за „Indecent Proposal“ (1993) и рекордни 11 милиони долари основна заработка за филмот „The Last Castle“ (2001).
Освен хонорарите, значителни средства доаѓале и од авторските права, режисерски проекти како „Ordinary People“ и „Quiz Show“, како и приходи кои ги генерираше „Sundance Institute“ и активностите поврзани со него.
Редфорд поседувал и импресивно портфолио од недвижности. Меѓу најпознатите имоти бил ранчот во близина на „Sundance“ во сојузната држава Јута, познат и по снимањето на филмот „The Horse Whisperer“, кој во 2021 година беше ставен на пазарот по цена од 4,9 милиони долари.
Исто така бил сопственик на поголеми земјишни поседи во Јута, вклучувајќи и имот од околу 1.800 акри, од кои голем дел бил заштитен во рамките на програма за зачувување на природата.
Неговиот поранешен имот во Долината Напа, познат како „Danza del Sol“, се простирал на 10 акри, а ја одразувал неговата силна поврзаност со природата и уметноста.
Кон крајот на 2024 година, Редфорд ја продаде и својата куќа на брегот во Тибурон, Калифорнија за околу 4,65 милиони долари. Во минатото беше сопственик и на други недвижности, вклучувајќи резиденции во Њујорк, Малибу, Аспен и Санта Фе, што укажува на живот поминат во близина на културни центри, но и природни убавини.
