Студијата, објавена во списанието „Journal of Personality and Social Psychology“, опфатила 44 учесници кои најпрво биле анкетирани за своите политички ставови и сместени на скала од 0 (исклучително либерални) до 100 (исклучително конзервативни).

Научници мерале мозочна активност

Учесниците потоа двапати гледале 18-минутно видео од жешка дебата за миграција и реформа на полицијата помеѓу демократот Тим Каин и републиканецот Мајк Пенс за време на дебатата на кандидатите за потпретседател на САД во 2016 година.

Додека учесниците го гледале видеото, делумно на МРИ скенер, научниците мерале мозочна активност. Резултатите откриле дека лицата со поекстремни политички ставови покажувале слични невронски образци. Содржината на видеото предизвикала посилни невронски реакции во делови од мозокот поврзани со обработка на емоции, особено страв и закана.

Тие реакции биле особено изразени за време на моменти на остри вербални судири помеѓу учесниците во дебатата. Покрај тоа, учесниците со екстремни политички ставови покажале засилено физиолошко возбудување, измерено со електродермометрија, односно мерење на електричен отпор или електрична спроводливост на кожата.

Според студијата, се чини дека овие физички реакции ги зајакнале невронските процеси, што сугерира дека емоциите и возбудувањето играат улога во засилување на политичките убедувања на поединците.

Го поврзале резултатот со теоријата на потковица

„Наспроти тоа, политички умерените лица покажале поразновидни мозочни реакции, што сугерира дека екстремизмот, далеку надвор од самата идеологија, го поттикнува овој заеднички начин на обработка на политичките информации“, објаснил психологот ФелдманХал.

Тимот научници, исто така, ги поврзал резултатите од студијата со добро познатата теорија на потковица, која тврди дека политичката поделба на левица и десница не е линеарна, туку повеќе има облик на коњска потковица, односно дека радикалната десница и радикалната левица, и покрај остро спротивставените идеологии, се меѓусебно многу помалку различни од центристичката либерална позиција.

„Тоа сугерира дека не е само она во што верувате, туку и колку силно во тоа верувате и колку сте емоционално реактивни го обликува вашето перцепирање на политичката реалност“, додала коавторката на студијата Даантје де Бруин.

Научниците нагласуваат дека добиените резултати се засновани на политичкиот контекст на САД и не мора нужно да се однесуваат на други земји.