Среде Европа постои ентитет што звучи како нешто од роман – земја без територија, со сопствен пасош, валута, па дури и поштенски марки, но со само тројца државјани.
Добредојдовте во светот на Малтешкиот витешки ред.
Малтешкиот витешки ред, познат и како Суверен воен болничарски ред на Свети Јован Ерусалимски од Родос и Малта, е основан уште во 1099 година во Ерусалим како болница за сиромашни аџии. Веќе во 1113 година, папата официјално го признал неговиот статус на витешки и религиозен ред. Низ вековите, редот го менувал своето седиште – од Родос, потоа од Малта – но го задржал својот суверенитет, иако денес нема територија.
Денес, овој ред функционира од два имота во Рим, од каде што издава свои пасоши, печати пари и поштенски марки, па дури и има регистарски таблички. Сепак, само три лица во светот поседуваат пасош на Малтешкиот ред: Големиот мајстор, неговиот заменик и канцеларот. Сите други членови ги користат пасошите на своите матични земји.
Меѓу оние кои поседуваат дипломатски пасош на Малтешкиот ред се:
Големиот мајстор (од 3 мај 2023 година) Џон Т. Данлап,
Големиот командант (од септември 2022 година) Емануел Русо,
Големиот канцелар (од септември 2022 година) Рикардо Патерно ди Монтекупо.
Денес, Малтешкиот ред има околу 13.500 членови – витези, дами и свештеници – и повеќе од 100.000 волонтери низ целиот свет. Иако нема територија, Малтешкиот ред е суверен субјект на меѓународното право, признат од 112 држави и одржува дипломатски односи со 104 земји, вклучувајќи ги Шпанија, Русија и Америка. Интересно е што Велика Британија, САД и Нов Зеланд не ги признаваат пасошите на овој ред.
Редот е првенствено хуманитарна организација. Неговите членови обезбедуваат медицинска помош, помагаат при катастрофи и работат на зачувување на христијанските вредности. Финансирањето доаѓа од донации, подароци и партнерства.
