Вака започнува репортажата од Владивосток од Стив Розенберг, уредник на Би-би-си во Русија и Бен Тавенер, новинар од московското биро на британскиот медиумски сервис.

Тавенер напиша на Икс дека ова е првпат Би-би-си да интервјуира Руси кои војувале во Украина.

Во продолжение целокупната репортажа.

Играчите ги извадија своите протези и седат во специјално направени санки.

Тие користат хокеарски стапови за да се движат низ лизгалиштето.

Дмитрије се надева дека еден ден ќе стане параолимписки шампион во хокеј на мраз.

Остварувањето на тој сон нема да биде толку лесно.

На руските тимови им беше забрането да учествуваат на последните Параолимписки игри поради војната во Украина.

И како и сите негови соиграчи, Дмитрије бил на првата линија.

„Проектилот леташе кон мене. Паднав на земја и чувствував како ногата да ми гори.

Погледнав надолу и видов дека повеќе ја немам. Го подврзав остатокот од ногата, а момците ме извлекоа оттаму“, се присети тој на периодот додека се борел во Украина.

„Мојата сопруга е хирург. И испратив слика од ногата и таа рече: „Веројатно ќе ја отсечат“. Добро“, ѝ реков. Ќе имам една нога помалку, не е важно“, додаде Русинот.

Владивосток е речиси исто толку оддалечен од Украина колку и од Москва

Пристанишниот град Владивосток е оддалечен повеќе од 6.400 километри воздушна линија од Украина и нешто помалку од Москва, руската престолнина. Се наоѓа во Азија.

Границата со Северна Кореја е оддалечена 128 километри од Владивосток, а Кина е оддалечена само 56 километри.

Сепак, последиците од далечната војна во Европа се повеќе од видливи.

На гробиштата на ридот, со поглед на градот, може да се забележат редици свежи гробови на руски војници кои загинале во Украина.

Покрај секој гроб се наоѓаат православни христијански крстови, а се веат воени знамиња и руски тробојки.

Во друг дел од гробиштата се наоѓа споменикот на „хероите на Специјалната воена операција“, како што Кремљ официјално ја нарекува војната во Украина.

Таму има уште гробови и статуа на вооружен руски војник.

На него пишува „Војниците живеат вечно“.

По наредба на претседателот Владимир Путин, руските трупи ја преминаа границата со Украина во февруари 2022 година.

Оваа инвазија во западниот свет се смета за обид на Кремљ да ја врати Украина под контрола на Москва.

Повеќе од три и пол години подоцна, војната продолжува да беснее.

Често ме прашуваат во емисиите: што мисли рускиот народ за војната во Украина, за конфликтот со Западот и за претседателот Путин?

Тешко е да се одговори на тоа.

На крајот на краиштата, Русија е огромна и разновидна.

Најголемата земја во светот се протега на два континента и 11 временски зони.

Некои делови од Русија, како што се Курск и Белгород, се граничат со Украина.

Други делови од земјата, како Приморскиот крај каде што сум сега, се далеку од борбите.

Владивосток е административен центар.

„Се надевавме дека средбата меѓу Трамп и Путин ќе промени нешто, но не го направи тоа“

Ова е моето најдалечно патување во рамки на Русија од почетокот на војната и е можност да го проценам расположението во друг дел од земјата.

„Секако дека сме загрижени. Ова трае со години и сакаме да заврши што е можно поскоро. Се надевавме дека средбата (Трамп и Путин) на Алјаска ќе промени нешто, но не го направи тоа“, ми вели Светлана во парк во Владивосток кога зборувавме за војната во Украина.

„Луѓето се луѓе, без разлика дали се Британци или Американци, Јапонци или Украинци. Не знам од каде потекнува целата оваа омраза“, додаде таа.

Разговарам и со Илија, кој тврди дека војната во Украина многу не му го променила животот во Русија.

„Сè уште можете да заработувате и да се снаоѓате тука. Животниот стандард не расте, но ниту опаѓа. Сепак, се надеваме дека односите со другите земји ќе се подобрат и дека ќе се реинтегрираме во глобалниот простор“, вели Илја.

Во центарот на Владивосток, застанувам да го слушнам бендот што свири во пешачката зона. Не сум сам.

Група луѓе се собрале за да уживаат во импровизиран рок концерт. За време на паузата, разговарам со пејачот, млад локален музичар кој се нарекува Џони Лондон.

„Дали луѓето зборуваат многу за тоа што се случува во Украина?“ прашувам.

„Луѓето на мои години обично не зборуваат за тоа. Би се осмелил да кажам дека ние никогаш не зборуваме за тоа“, рече Џони.

„Зошто?“ праша новинарот на Би-би-си.

„Не можеме ништо да направиме во врска со тоа, тоа е надвор од наша контрола, надвор од наше влијание. Се надевам дека сè ќе се врати во нормала за неколку години“, одговори младиот човек.

„А што е нормално?“ праша новинарот.

„Да нема војна, претпоставувам. Тоа би било убаво“, рече младиот Русин.

Руски пензионер кој знае дека Бајден ги украл изборите

Додека го завршувам разговорот со Џони, ми се приближува пензионер по име Виктор. Ме препозна.

Ме видел на телевизија минатата година на прес-конференција со Владимир Путин, рече новинарот на Би-би-си.

„Му постави прашање на Путин, нели? Вие сте од Би-би-си“, рече Виктор.

Виктор е голем обожавател. Не на Би-би-си, туку на претседателот Путин.

Тој го критикува моето „провокативно прашање“ до лидерот на Кремљ за војната во Украина, го брани рускиот политички систем и ја осудува администрацијата на Џозеф Бајден за претседателските избори во САД во 2016 година, вели новинарот.

„Со гласачките ливчиња по пошта, Бајден практично ги украде изборите од Трамп“, рече Виктор.

„Тоа е она што го вели Трамп“, му одговори новинарот.

„И Путин така вели“, додаде Виктор.

„Само затоа што Путин го вели тоа не значи дека е факт“, рече новинарот на Би-би-си.

„Вистина, но тоа е она што го мисли нашиот народ“, признава Виктор.

Виктор, исто така, верува дека Западот губи моќ и влијание.

„Погледнете што се случува. Оваа недела во Кина се сретнаа лидерите на Кина, Индија и Русија, како и на многу други земји, но го немаше Трамп, ја немаше Велика Британија, ја немаше Германија, ја немаше Франција. Само Индија и Кина имаат три милијарди луѓе“, вели Виктор.

На враќање од Кина, Владимир Путин застанува во Владивосток.

Доколку имам можност да му поставам на претседателот уште едно прашање, Виктор предлага тоа да биде за „новиот светски поредок“.

Градот се подготвува за посетата и учеството на Путин на Источниот економски форум.

Покрај патот што води до местото на одржување, забележувам голем мурал, раскажува новинарот.

Муралот на Путин со амурски (сибирски) тигар

Уличниот уметник Филип Дулмаченко употребил 1.800 лименки аеросолна боја за да го наслика Владимир Путин во воена униформа како прегрнува сибирски тигар.

„Амурскиот тигар отсекогаш бил симбол на дивите животни, а Владимир Путин е симбол на Русија“, рече Филип.

Порано, како тинејџер, имал проблеми со полицијата поради уметноста што ја создава.

Но, властите го одобриле муралот на Путин.

Заедно со сликата, уметникот напишал кратка реченица – фраза за која Филип вели дека едноставно се однесува на изгрејсонцето на Далечниот Исток.

Меѓутоа, во комбинација со сликите на тигар и претседател кој верува дека ја враќа моќта на Русија, зборовите се чини дека добиваат подлабоко значење: „Зората започнува тука“.