Рома бара начин да се ослободи од Артем Довбик, а најверојатна опција е да го испрати на заем во друг клуб со договор во завршницата на преодниот рок.
„Волчицата“ имаше идеја да направи размена со Милан, во која на „Олимпико“ би се преселил Сантијаго Хименез, но засега Мексиканецот не дал зелено светло за ваков маневар.
Новиот тренер на Рома, Џан Пјеро Гасперини е убеден дека Довбик не може да се адаптира на неговиот стил на игра, клубот им порачал на агентите дека мора да му најдат солуција, бидејќи во спротивно ќе има многу мала минутажа.
Ставот на Хименез можеби ќе се промени по промоцијата на Кристофер Нкунку, додека истовремено одамна е јасно дека мексиканскиот напаѓач не е во прв план кај Макс Алегри.
Довбик е интересен и за Вилјареал, екипа со која ќе може да игра во Лигата на шампионите, а и да се врати во првенството каде блескаше во дресот на Џирона.
