Украинскиот претседател Володимир Зеленски изјави дека не гледа знаци дека Русија е подготвена за трилатерален самит помеѓу него, претседателот на САД Доналд Трамп и рускиот колега Владимир Путин.
„Во оваа фаза нема знаци од Русија дека ќе се одржи трилатералниот самит“, рече тој за време на кратка заедничка прес-конференција со претседателката на Европската комисија Урсула фон дер Лајен.
Шефицата на Европската комисија рече дека се надева на трилатерален самит „што е можно поскоро“.
Преговарачка позиција на Украина
Украинскиот претседател рече дека сегашните линии на фронтот во војната на неговата земја против Русија треба да бидат основа за мировни преговори.
„Ни требаат вистински преговори, што значи дека можеме да започнеме таму каде што е сега линијата на фронтот“, рече Зеленски, додавајќи дека европските лидери го поддржуваат тоа.
Зеленски ја повтори својата позиција дека е потребно воспоставување примирје за потоа да се преговара за конечен договор.
Дипломатска офанзива со европските сојузници
„Важно е што Вашингтон е со нас“, рече украинскиот лидер. На разговорите со Трамп во понеделник ќе го придружуваат неколку европски сојузници.
Украинскиот претседател отпатува во Брисел за да учествува на видеоконференцијата „коалиција на подготвените“, која ги обединува поддржувачите на Киев, вклучително и францускиот претседател Емануел Макрон, британскиот премиер Кир Стармер и германскиот канцелар Фридрих Мерц. Потоа, заедно со европските лидери, ќе лета за Вашингтон за да се сретне со Доналд Трамп во Белата куќа.
„Не знам точно за што разговарале Путин и претседателот Трамп за време на нивниот самит на Алјаска, рече Зеленски. „А би сакал претседателот Трамп со мене и со европските лидери да сподели многу детали“, додаде тој.
Безбедносни гаранции и руски барања
Она што ни го „рече претседателот Трамп за безбедносните гаранции за мене е многу поважно од размислувањата на Путин. Бидејќи Путин нема да ни даде никакви безбедносни гаранции.“
Украинскиот лидер исто така рече дека неговиот руски колега Владимир Путин има „многу барања“ за завршување на конфликтот во Украина, но дека „не му се познати сите“.
„Ако навистина ги има толку колку што слушнавме, тогаш ќе биде потребно време за сите да ги разгледаме“, рече тој.
Говорејќи заедно со Володимир Зеленски, шефицата на Европската комисија го поздрави предлогот на американскиот претседател Доналд Трамп на Украина да ѝ се понудат безбедносни гаранции слични на оние на НАТО.
