Македонската фудбалска репрезентација ќе одигра пријателски натпревар со Саудиска Арабија, а истиот е закажан за 4. септември во Прага, Чешка.
Фудбалската федерација на Македонија денеска го потврди контролниот дуел со азиската селекција, кој доаѓа во пресрет на продолжението од мундијалските квалификации.
Ова ќе биде трет меѓусебен натпревар помеѓу двете репрезентации. Првиот се одигра на 1. август 2001 година во Ријад и заврши без победник (1:1). Вториот меч беше на 22. октомври 2022 година во Абу Даби, кога Саудиска Арабија славеше со 1:0. За Македонија на натпреварот настапија фудбалери од домашниот шампионат.
Актуелен селектор на Саудиска Арабија е Французинот Ерв Ренар, кој го наследи Роберто Манчини во октомври минатата година.
Контролниот меч во Прага ќе биде важен тест за нашите најдобри фудбалери и можност за селекторот Благоја Милевски да ја провери формата и тактичките замисли пред продолжението на квалификациите за Светското првенство 2026. Само три дена подоцна, на 7 септември, Македонија ќе го пречека Лихтенштајн на Националната арена „Тодор Проески“ во Скопје.
