Сега е откриено дека пауните, познати по својата волшебна убавина, имаат нешто во опашките што потсетува на вистински ласери.
Паунот е птица која има посебни пердуви. Нивните пердуви содржат наноструктури кои ја расејуваат светлината на таков начин што нивните пердуви блескаат во нијанси на сина и зелена боја.
Меѓутоа, научниците од Политехничкиот универзитет во Флорида и универзитетот „Youngstown State“ во САД нанеле посебна боја на различни делови од опашка на паун и откриле нешто уште поневеројатно, пренесе „Science Alert“.
Во „очите“ што ги красат нивните раскошни пердуви, пронајдени се уникатни структури што ги хармонизираат светлосните бранови одбивајќи ги напред-назад, претворајќи ги во жолто-зелени ласери.
Ласер, што е кратенка за „Light Amplification by Stimulated Emission of Radiation“ настанува кога атомите во одредени материјали колективно емитуваат фотони во координирани бранови.
Таквото засилување на светлината не е реткост во природата, но ова е прв пат да биде откриено кај птиците на толку спектакуларен начин.
Истражувачите пронашле докази за оптички шуплини во наноструктурите во „очите“ на пердувите, кои емитуваат две бранови должини – зелена и жолто-портокалова.
Точниот тип на структура што ги усогласува овие бранови сè уште не е познат, но фактот дека истата светлина се емитува на сите делови од пердувите укажува на нешто уникатно.
Разбирањето на овие структури би можело да го унапреди развојот на ласерската технологија или да им помогне на биолозите во проучувањето на живите материјали.
Зошто еволуцијата „вградила“ ласери во опашките на пауните останува мистерија, но можеби е во прашање видлива порака за другите пауни, приспособена на нивниот уникатен визуелен спектар.
