Чонгкинг се наоѓа во планините на југозападна Кина и е познат по својата природна и урбана структура, поради што го добил прекарот 8D City (осумдимензионален град). Целата негова површина е иста колку Австрија. Со оглед на тоа што неговата географија е во голема мера обликувана од планините и брзиот економски развој, немал друг избор освен да „расте“ нагоре. Ова е толку изразено што воз буквално поминува низ една од зградите.

На некои жители и туристи им е забавно да талкаат по градските серпентини.

„Градот всушност ги надмина моите очекувања“, рече Гуви, Канаѓанец кој ги објавува своите видеозаписи од патувања на Јутјуб.

Растечка туристичка дестинација

Гуви го започнал своето патување во Шангај, но набргу посакал да доживее еден поавтентичен кинески град.

„Во Шангај, слушнав некои луѓе како зборуваат за Чонгкинг. Шангај е неверојатен град, но ме интересираше да видам една поавтентична Кина, нешто различно од Шангај, каде што сè уште можете да се снаоѓате на англиски јазик“, рече тој.

Тој не е единствениот што го заобиколил Пекинг, Сиан и другите кинески градови за да го посети Чонгкинг. Туризмот во овој град почна брзо да се развива по укинувањето на мерките против пандемијата на коронавирус.

Социјалните мрежи се главниот начин на кој помладите луѓе дознаваат за овој град. Влијанието на социјалните мрежи се гледа и во фактот дека видеото на Инстаграм на кое се гледа зграда каде што мислите дека сте на нејзино приземје, а всушност сте на 12-ти кат, има 17 милиони прегледи.

Според властите, минатата година градот го посетиле 1,3 милиони туристи, што е за 184 отсто повеќе од претходната година. Понатаму, во првите два месеци од оваа година, преку градските пристаништа влегле 60% повеќе странски државјани, во споредба со истиот период минатата година.

Со оглед на близината и прифатливата цена на авионските билети, повеќето туристи се од Југоисточна Азија, Јапонија и Јужна Кореја. Меѓутоа, бројот на туристи од Европа и Австралија се зголемува. Всушност, најголемото зголемување на бројот на туристи е од Соединетите Американски Држави, што е импресивно бидејќи има само еден директен лет неделно од САД до овој кинески град.

Популарните туристички места вклучуваат старото градско јадро и планинските патеки, кои ги посетил светски познатиот јутјубер Спид. Покрај тоа, популарни се и напуштената воена нуклеарна централа, камените резби Дазу и трите големи, природно формирани камени мостови Вулонг, познати и од филмот „Transformers 4“.

„Cyberpunk сон“

Архитектурата на Чонгкинг е причината зошто се нарекува „Cyberpunk“, што е поджанр на научна фантастика што го одразува опресивно општество доминирано од компјутерската технологија.

„Архитектурата на градот е единствена. Бетонот и планините, со многу индустриски дизајн, го прават да изгледа како футуристички филмски сет, а ноќе свети како вистински киберпанк сон“, рече 34-годишниот Американец Метју Блер, кој се преселил во овој град во 2009 година.

Еден од индикаторите за тоа колку градот е архитектонски импресивен зборува фактот дека на покривот на 22-катната зграда Куи Синг постои голем плоштад. Мултидимензионалната структура на градот не е прашање на естетика, туку на неопходност. Причината за ова е што, градот со своите 32 милиони жители, се протега преку клисури, падини и речни долини. Значи, конвенционалното урбанистичко планирање било неприменливо.

Од друга страна еден облакодер може да има влез на неколку катови – првиот, 12-тиот или 20-тиот кат.

Значење на градот

Како Пекинг и Шангај, Чонгкинг е еден од четирите градови на покраинско ниво директно управувани од централната влада. Тој е меѓу петте кинески градови со најголема економија. Се смета за центар што ги поврзува истокот и западот на земјата.

За време на Втората светска војна, тој беше воен главен град поради неговата географија погодна за одбрана од непријатели. Наследството од военото време е составен дел од современиот секојдневен живот, што исто така значи дека туристите можат да посетат еден од рестораните што се наоѓаат во засолништа од Втората светска војна.

Градот се развива исклучително брзо, а тоа се одразува и во неодамна отворената импресивна брза железница со површина од 1,22 милиони квадратни метри, што е површина од 170 фудбалски игралишта. Се верува дека е најголемата брза железница во светот изградена во една фаза.

Импресивноста на градот се огледа и во неговото осветлување, што само по себе е туристичка атракција. Фактот дека туризмот во овој град е многу важен за Кинезите се огледа и во фактот дека во врвот на туристичката сезона, владата преку СМС пораки ги повикува локалните жители да останат дома за туристите да имаат повеќе простор, пренесе Си-ен-ен.