Петнаесетгодишно британско момче, кое исчезнало додека се враќало од одмор со семејството, било пронајдено во Италија, откако се покажало дека ненамерно влегло во погрешен лет без валидна авионска карта.
Инцидентот се случил на аеродромот во Менорка, каде што семејството требало да се качи на лет за Лондон („Stansted“) во утринските часови. Родителите го пријавиле исчезнувањето веднаш по пристигнувањето, откако го изгубиле синот од вид, пишува „Metro“.
По активирањето на системот за тревога поради исчезнато дете, снимките од безбедносните камери покажале дека момчето успеало само да помине низ безбедносните проверки и да се качи на лет на „EasyJet“ за Милано.
Се претпоставува дека го искористило моментот кога вработените на излезот завршиле со обработката на патниците и ги напуштиле своите места, што му овозможило незабележано да влезе во авионот.
Момчето, по слетувањето во Милано, било пречекано од претставници на „EasyJet“ и италијанските власти. Неговата мајка набрзо потоа заминала со првиот следен лет за Милано, по што заедно се вратиле во Велика Британија.
Портпаролот на компанијата „EasyJet“ изјави: „Соработуваме со аеродромот и нашите партнери за земјено опслужување во Махон за да утврдиме како малолетен патник успеал незабележано да се качи на погрешен лет без придружба и валидна карта“.
Портпаролот на полицијата во Менорка додаде дека системот за исчезнати деца на аеродромот веднаш бил активиран, но и деактивиран штом било потврдено дека момчето е во авионот за Италија.
